Read Shona Union Version 2002 Mapisarema 44 Bible Online

Mapisarema 44 - Shona Union Version 2002 bible

Mapisarema 44

¹Kumutungamiriri wokuimba; Pisarema ravanakomana vaKora. Rwiyo rweMashiri. Mwari, takanzwa nenzeve dzedu, madzibaba edu akatiudza, Basa ramakabata pamisi yavo, napamisi yekare.

²Makadzinga vahedheni noruoko rwenyu, mukavasima ivo; Makatambudza ndudzi dzavanhu mukavaparadzira ivo.

³Nokuti havana kuzviwanira nyika nomunondo wavo, Ruoko rwavo haruna kuvaponesa; Asi chanza chenyu chorudyi, noruoko rwenyu, nechiedza chechiso chenyu, Nokuti maivafarira.

⁴Ndimi Mambo wangu, imi Mwari; Rairai kuti Jakobho akunde.

⁵Nemi tichawisira pasi vadzivisi vedu; Nezita renyu tichatsika pasi vanotimukira.

⁶Nokuti handingavimbi nouta hwangu, Nomunondo wangu haungandiponesi.

⁷Asi imi makatiponesa pavadzivisi vedu, Mukanyadzisa vanotivenga.

⁸Takazvirumbidza zuva rose munaMwari, Tichavonga zita renyu nokusingaperi.

⁹Asi zvino makatirasha henyu, mukatinyadzisa; Hamuchafambi nehondo dzedu.

¹⁰Munotitizisa pamberi pavadzivisi; Vanotivenga vanozvipambira.

¹¹Makatiisa samakwai akatarirwa kubayiwa; Makatiparadzira pakati pavahedheni.

¹²Munotengesa vanhu venyu musina chamunopiwa, Hamuna kuwedzera pfuma yenyu nomutengo wavo.

¹³Munotiita vanhu vanosekwa navatinogara navo, Vanhu vanozvidzwa nokusekwa navakatikomberedza.

¹⁴Munotiita shumo pakati pavahedheni, Vanhu vanotidzungudzira misoro.

¹⁵Zuva rose kuzvidzwa kwangu kuri pamberi pangu, Kunyara kwechiso changu kwakandifukidza.

¹⁶Nokuda kwezwi romutuki nomuzvidzi; Nokuda kwomuvengi nomutsivi.

¹⁷Izvi zvose zvakatiwira; kunyange zvakadaro hatina kukukanganwai, Hatina kunyengedzera pasungano yenyu.

¹⁸Mwoyo yedu haina kudzokera shure, Kutsika kwedu hakuna kutsauka panzira yenyu;

¹⁹Kunyange makatipwanya-pwanya panzvimbo yamakava, Mukatifukidza nomumvuri worufu.

²⁰Kana tichinge takanganwa zita raMwari wedu, Kana kutambanudzira maoko edu kumwari wavamwe;

²¹Ko Mwari haanganzveri izvozvo here? Nokuti iye anoziva zvakavanzika zvomwoyo.

²²Zvirokwazvo, nokuda kwenyu tinourawa zuva rose; Tinonzi tiri makwai akatarirwa kubayiwa.

²³Mukai, munovatireiko, Ishe? Mukai, musatirasha nokusingaperi.

²⁴Munovanzireiko chiso chenyu, Muchikanganwa kutambudzika kwedu nokumanikidzwa kwedu?

²⁵Nokuti mweya wedu wakotamira kuguruva; Dumbu redu rinonamatira pavhu.

²⁶Simukai mutibatsire, Mutidzikinure nokuda kwounyoro hwenyu.