Read Shona Union Version 2002 Mapisarema 45 Bible Online

Mapisarema 45 - Shona Union Version 2002 bible

Mapisarema 45

¹Kumutungamiriri wokuimba; nomuimbirwo weShoshanimi; Pisarema ravanakomana vaKora. Rwiyo rweMashiri. Rwiyo rworudo. Mwoyo wangu unotutuma namashoko akanaka; Ndinotaura zvinhu zvandakaita zvinoreva mambo; Rurimi rwangu ipeni yomunyori anokurumidza kunyora.

²Imi makanaka-naka kupfuura vana vavanhu; Nyasha yakadururirwa pamiromo yenyu; Saka Mwari wakakuropafadzai nokusingaperi.

³Sungai munondo wenyu pachiuno chenyu, imi wamasimba, Ukuru hwenyu nohumambo hwenyu.

⁴Fambai noumambo hwenyu muchikunda, Nokuda kwezvokwadi nounyoro nokururama; Ruoko rwenyu rworudyi ngarukudzidzisei zvinotyisa.

⁵Miseve yenyu inopinza; Vanhu vanokundwa nemi; Inobaya pamwoyo yavavengi vamambo.

⁶Chigaro chenyu choushe, imi Mwari, chiripo nokusingaperi-peri; Tsvimbo youshe hwenyu itsvimbo yakarurama.

⁷Makada kururama, mukavenga kusarurama; Naizvozvo Mwari, Mwari wenyu wakakuzodzai Namafuta okufara kupfuura shamwari dzenyu.

⁸Nguo dzenyu dzose dzinonhuwira nemura nearosi neakasia; Madimbwa akakufadzai achiridzwa mudzimba dzamambo dzenyanga dzenzou.

⁹Vakunda vamadzimambo vari pakati pavanhukadzi venyu vanokudzwa; Paruoko rwenyu rworudyi vahosi vamire vakashonga ndarama yeOfiri.

¹⁰Terera mukunda, rangarira, urereke nzeve yako; Kanganwawo vanhu vako, neimba yababa vako;

¹¹Ipapo mambo achada kunaka kwako; Nokuti ndiye Ishe wako; unamate kwaari iwe.

¹²Uye mukunda weTiro achavapo nechipo; Vapfumi pakati pavanhu vachakumbira ngoni dzako.

¹³Mukunda wamambo akanaka kwazvo-kwazvo mukati meimba yamambo; Nguo dzake dzakarukwa nendarama.

¹⁴Uchaperekwa kuna mambo nenguo dzakarukwa dzinamavara; Mhandara, shamwari dzake dzinomutevera, Vachaiswa kwamuri.

¹⁵Vachaperekwa nomufaro nokufarisisa; Vachapinda mumba mamambo.

¹⁶Panzvimbo yamadzibaba ako vana vako vachavapo, Vauchaita machinda panyika yose.

¹⁷Ndichayeudzira zita renyu kusvikira kumarudzi ose; Naizvozvo ndudzi dzavanhu dzichakuvongai nokusingaperi-peri.