Read Shona Union Version 2002 Mapisarema 46 Bible Online

Mapisarema 46 - Shona Union Version 2002 bible

Mapisarema 46

¹Kumutungamiriri wokuimba; Pisarema ravanakomana vaKora; nomuimbirwo weAramoti. Rwiyo. Mwari ndiye utiziro hwedu nesimba redu, Ndiye mubatsiri ari pedyo-pedyo panguva dzokumanikidzwa.

²Saka hatingatyi, kunyange nyika ikashanduka, Uye kunyange makomo akabviswa akaiswa mukati mamakungwa;

³Kunyange mvura zhinji yawo ikatinhira nokumutswa, Kunyange makomo akadedera nokupupuma kwawo.

⁴Rwizi ruripo, rune hova dzinofadza guta raMwari, Iyo nzvimbo tsvene yetabhenakeri dzo Wokumusorosoro.

⁵Mwari ari mukati maro; haringazununguswi; Mwari acharibatsira kana utonga hwotsvuka.

⁶Vahedheni vakaita bope, hushe hwakazununguswa; Akataura nenzwi rake, nyika ikanyauka.

⁷Jehovha wehondo anesu; Mwari waJakobho inhare yedu.

⁸Uyai muone mabasa aJehovha, Zvishamiso zvaakaita panyika.

⁹Anogumisa kurwa kusvikira pakuguma kwenyika; Anovhuna uta, nokuvhuna-vhuna pfumo; Anopisa ngoro dzokurwa nomoto.

¹⁰“Nyararai, muzive kuti ndini Mwari; Ndichava mukuru pakati pavahedheni, ndichava mukuru panyika.”

¹¹Jehovha wehondo anesu; Mwari waJakobho inhare yedu.