Read Shona Union Version 2002 Mapisarema 48 Bible Online

Mapisarema 48 - Shona Union Version 2002 bible

Mapisarema 48

¹Rwiyo; Pisarema ravanakomana vaKora. Jehovha mukuru, anofanira kurumbidzwa kwazvo, Muguta raMwari wedu, mugomo rake dzvene.

²Rakanaka pakukwirira kwaro, mufaro wapasi pose, Ndizvo zvakaita gomo reZioni, pamativi okumusoro, Ndizvo zvakaita guta raMambo mukuru.

³Padzimba dzaro dzamambo Mwari wakazviratidza kuti ndiye nhare.

⁴Nokuti tarirai, madzimambo akaungana, Akapfuura pamwechete.

⁵Vakariona, vakashamiswa; Vakavhunduka, vakakurumidza kutiza.

⁶Vakabatwapo nokudedera; Nokurwadziwa, somukadzi anopona.

⁷Munoputsa zvikepe zveTarishishi, Nemhepo, inobva mabvazuva.

⁸Sezvatakanzwa, ndizvo zvatakaona Paguta raJehovha wehondo, iro guta raMwari wedu; Mwari acharisimbisa nokusingaperi.

⁹Takafunga unyoro hwenyu, Mwari, Mukati metemberi yenyu.

¹⁰Sezvakaita zita renyu, Mwari, Ndizvo zvakaitawo kurumbidzwa kwenyu kusvikira kumigumo yapasi pose; Ruoko rwenyu rworudyi ruzere nokururama.

¹¹Gomo reZioni ngarifare, Vakunda vaJudha ngavafare kwazvo, Nokuda kwezvamakatonga.

¹²Poteredzai Zioni, mupote naro, Muverenge shongwe dzaro.

¹³Cherekedzai zvakanaka nhare dzaro, Fambai pakati pedzimba dzaro dzamambo; Kuti muzoudza vazukuru venyu vanotevera.

¹⁴Nokuti Mwari ndiye Mwari wedu nokusingaperi-peri; Iye achava muperekedzi wedu kusvikira pakufa.