Read Shona Union Version 2002 Mapisarema 49 Bible Online

Mapisarema 49 - Shona Union Version 2002 bible

Mapisarema 49

¹Kumutungamiriri wokuimba; Pisarema ravanakomana vaKora. Inzwai chinhu ichi, imi vanhu vose; Teererai, imi mose mugere panyika;

²Imi vaduku navanokudzwa, Vapfumi navarombo pamwechete.

³Muromo wangu uchataura huchenjeri; Uye kufunga kwomwoyo wangu kuchava nenjere.

⁴Ndicharerekera nzeve yangu inzwe mufananidzo; Ndichadudza shoko rangu rakavanzika nembira.

⁵Ndichatya neiko pamisi yezvakaipa, Kana zvakaipa, zvavanoda kundidzinga, zvichindikomba?

⁶Ivo, vanovimba nepfuma yavo, Vanozvikudza pamusoro pokuwanda kwepfuma yavo;

⁷Hapana angatongodzikinura hama yake, Kana kupa Mwari rudzikinuro pamusoro pake;

⁸(Nokuti rudzikinuro rwemweya yawo runokosha, Runofanira kuregwa nokusingaperi;)

⁹Kuti arambe ari mupenyu misi yose, Arege kuona kuora.

¹⁰Nokuti anoona kuti vachenjeri vanofa, Benzi neasina njere vanopera pamwechete, Vachisiyira vamwe pfuma yavo.

¹¹Vanofunga pamwoyo pavo kuti dzimba dzavo dzichagara nokusingaperi, Nougaro hwavo kusvikira kumarudzi avo ose; Nyika dzavo vanodzitumidza mazita avo.

¹²Asi munhu haagari achikudzwa, Akafanana nemhuka dzinopera.

¹³Iyi ndiyo nzira yamapenzi; Kunyange zvakadaro vanhu vanovatevera vachitenda zvavanotaura.

¹⁴Vakatarirwa Sheori samakwai; Rufu ruchava mufudzi wavo; Vakarurama vachabata hushe pamusoro pavo mangwanani; Kunaka kwavo kuchangoparadzwa neSheori, kuti kurege kuva nougaro.

¹⁵Asi Mwari achadzikinura mweya wangu pasimba reSheori; Nokuti iye achandigamuchira.

¹⁶Usatya hako iwe kana mumwe munhu achifumiswa, Kana pfuma yeimba yake ichiwedzerwa;

¹⁷Nokuti kana achifa hapana chaachaenda nacho; Mukurumbira wake haungaburuki uchimutevera.

¹⁸Kunyange paupenyu hwake waikorokotedza mweya wake, (Kunyange vanhu vaikurumbidza kana uchizviitira zvakanaka),

¹⁹Achaenda iye kurudzi rwamadzibaba ake; Ivo havangatongooni chiedza nokusingaperi.

²⁰Munhu, anokudzwa, asina njere, Akafanana nemhuka dzinopera.