Read Shona Union Version 2002 Mapisarema 50 Bible Online

Mapisarema 50 - Shona Union Version 2002 bible

Mapisarema 50

¹Pisarema raAsafi. Mwari, iye Mwari, Jehovha, ndiye akataura, Akadana pasi pose kubva pakubuda kwezuva kusvikira pakuvira kwaro.

²Mwari akapenya Ari paZioni, iro rakanaka-naka kwazvo.

³Mwari wedu anouya, haangarambi anyerere; Moto unoparadza pamberi pake, Dutu guru rinomukomberedza.

⁴Anodana denga kumusoro, Napasi, kuti atongere vanhu vake;

⁵Unganidzirai vatsvene vangu kwandiri; Ivo vakaita sungano neni nezvibayiro.

⁶Kudenga-denga kunodudzira kururama kwake; Nokuti Mwari ndiye mutongi amene.

⁷“Inzwai vanhu vangu, ndichataura; Imi Isiraeri, ndichakupupurirai, Ndini Mwari, iye Mwari wenyu.

⁸Handingakutukiyi pamusoro pezvibayiro zvenyu; Zvipiriso zvenyu zvinopiswa zviri pamberi pangu nguva dzose.

⁹Handingatori nzombe paimba yako, Kana nhongo dzembudzi pazvirugu zvako.

¹⁰Nokuti mhuka dzose, dziri kudondo, ndedzangu, Nemombe pamakomo ane chiuru chamazana.

¹¹Ndinoziva shiri dzose dzomumakomo; Mhuka dzose, dziri musango, ndedzangu.

¹²Kana ndaiva nenzara, handizaikuudza iwe; Nokuti nyika ndeyangu, nezvaizere nazvo.

¹³Ko ndingadya nyama yehando, Kana kunwa ropa rembudzi here?

¹⁴Bayirai Mwari zvibayiro zvokuvonga; Uripire Wokumusorosoro mhiko dzako;

¹⁵Udane kwandiri pazuva rokutambudzika; Ini ndichakurwira, iwe ugondirumbidza.”

¹⁶Asi kuneakaipa Jehovha anoti, “Iwe ungadudzira seiko zvandakatema, Nokureva sungano yangu nomuromo wako?

¹⁷Zvaunovenga kurairwa, Nokurasha mashoko angu shure kwako.

¹⁸Wakati uchiona mbavha, ukafarirana nayo, Unoshamwaridzana nemhombwe.

¹⁹Unotendera muromo wako kureva zvakaipa, Rurimi rwako runotaura nhema.

²⁰Unogara uchipomera hama yako; Unoita makuhwa pamusoro pomwanakomana wamai vako.

²¹Zvinhu izvi wakazviita, ndikaramba ndinyerere; Wakafunga kuti ini ndakafanana newe chose; Asi ndichakuraira, ndichirongedzera zvinhu izvi pameso ako.

²²Zvino fungai chinhu ichi, imi vokukanganwa Mwari, Ndirege kukubvamburai, mukashaiwa murwiri,

²³Munhu, anobayira chibayiro chokuvonga, unondikudza; Uye anogadzira nzira yake zvakanaka Ndichamuratidza kuponesa kwaMwari.”