Read Shona Union Version 2002 Mapisarema 51 Bible Online

Mapisarema 51 - Shona Union Version 2002 bible

Mapisarema 51

¹Kumutungamiriri wokuimba. Pisarema raDhavhidhi, panguva yakasvika muporofita Natani kwaari, iye apinda kuna Bhatishebha. Ndinzwirei tsitsi, Mwari nokuda kwounyoro hwenyu; Dzimai kudarika kwangu nokuda kwengoni dzenyu zhinji.

²Ndisukei zvakaipa zvangu chose, Ndinatsei chivi changu.

³Nokuti ndinoziva kudarika kwangu; Chivi changu chinogara chiri pamberi pangu.

⁴Ndakakutadzirai imi, iyemi moga, Ndakaita chinhu chakaipa pamberi penyu; Kuti munzi makarurama pakutaura kwenyu, Muve usina mhosva pakutonga kwenyu.

⁵Tarirai, ndakaberekerwa muzvakaipa; Mai vangu vakandigamuchira muzvivi.

⁶Tarirai, munoda zvokwadi pamwoyo; Munoda kundidzidzisa uchenjeri mukati makavanda.

⁷Ndinatsei nehisopi, ndive akanaka, Ndishambidzei, ndichene kupfuura mazaya echando.

⁸Ndinzwisei mufaro ndive nomwoyo muchena; Kuti mapfupa amakavhuna afare.

⁹Vanzirai zvivi zvangu chiso chenyu, Dzimai zvakaipa zvangu zvose.

¹⁰Sikai mukati mangu mwoyo wakachena, Mwari; Vandudzai mukati mangu mweya wakarurama.

¹¹Regai kundirasha pamberi penyu; Musabvisa mweya wenyu mutsvene kwandiri.

¹²Dzoseraizve kwandiri mufaro wokuponesa kwenyu; Nditsigirei nomweya, unoda.

¹³Ipapo ndichadzidzisa vadariki nzira dzenyu; Uye vatadzi vachatendeukira kwamuri.

¹⁴Ndirwirei pamhosva yeropa, Mwari, imi Mwari muponesi wangu; Ipapo rurimi rwangu ruchaimbira kururama kwenyu kwazvo.

¹⁵Ishe, zarurai miromo yangu; Ipapo muromo wangu uchaparidza kurumbidzwa kwenyu.

¹⁶Nokuti imi hamufariri zvibayiro; ndingadai ndaikupai izvo; Hamufadzwi nechipiriso chinopiswa.

¹⁷Zvibayiro zvaMwari mweya wakaputsika; Mwoyo wakaputsika nowakapwanyika, imi Mwari hamungaushori.

¹⁸Itirai Zioni zvakanaka nokuda kwenyu; Vakai masvingo eJerusaremu.

¹⁹Ipapo muchafarira zvibayiro zvakarurama, nechipiriso chinopiswa nechipiriso chinopiswa chose; Ipapo vachabayira nzombe paaritari yenyu.