Read Shona Union Version 2002 Mapisarema 52 Bible Online

Mapisarema 52 - Shona Union Version 2002 bible

Mapisarema 52

¹Kumutungamiriri wokuimba. Rwiyo rweMashiri rwaDhavhidhi; panguva yakasvika Dhoegi muEdhomu akaudza Sauro, achiti, “Dhavhidhi asvika paimba yaAhimereki.” Unozvirumbidzireiko nezvakashata, iwe mhare? Tsitsi dzaMwari dziripo misi yose.

²Rurimi rwako runofunga kutaura zvakaipa; Rwakafanana nechisvo chinopinza, ruchiita zvinonyengera.

³Unoda zvakaipa kupfuura zvakanaka; Nokureva nhema kupfuura kutaura zvakarurama.

⁴Unoda mashoko ose okuparadza, Iwe rurimi runonyengera.

⁵Mwari achakuparadzawo saizvozvo nokusingaperi, Achakubata akakubvisa patende rako, Nokukudzura panyika yavapenyu.

⁶Vakarurama vachazviona vakatya, Vachamuseka, vachiti,

⁷“Tarirai, hoyu munhu asina kuita Mwari nhare yake, Asi akavimba nokuwanda kwepfuma yake, Akazvisimbisa pazvakaipa zvake.”

⁸Asi kana ndirini, ndakafanana nomuorivhi munyoro muimba yaMwari; Ndinovimba netsitsi dzaMwari nokusingaperi-peri.

⁹Ndichakuvongai nokusingaperi, nokuti ndimi makazviita; Ndichamirira zita renyu pamberi pavatsvene venyu nokuti rakanaka.