Read Shona Union Version 2002 Mapisarema 55 Bible Online

Mapisarema 55 - Shona Union Version 2002 bible

Mapisarema 55

¹Kumutungamiriri wokuimba; nemitengeranwa. Rwiyo rweMashiri rwaDhavhidhi. Rerekerai nzeve yenyu kumunyengetero wangu, Mwari; Regai kuzvivanza pakukumbira kwangu.

²Nditeererei, mundipindure; Ndinoshaiwa zororo mukuchema kwangu, ndichiuura;

³Nokuda kwezwi romuvengi, Nokuda kwokumanikidza kwoakaipa; Nokuti vanondipomera zvakaipa, Vanonditambudza nokutsamwa kwavo.

⁴Mwoyo wangu unorwadziwa kwazvo mukati mangu; Garudzo rorufu rakandiwira,

⁵Kutya nokubvunda zvakandiwira. Kutya kukuru kwakandifukidza.

⁶Ini ndakati, “Haiwa, dai ndaiva namapapiro senjiva! Ndaibhururuka, ndikandozorora.

⁷Tarirai, ndingadai ndaitizira kure, Ndaindogara kurenje.

⁸Ndaikurumidza kundovanda, Nditize mhepo inovhuvhuta nedutu guru.”

⁹Paradzai, Ishe mukanganise marimi avo; Nokuti ndakaona kumanikidza nokurwa muguta.

¹⁰Masikati nohusiku vanoripoteredza pamasvingo aro; Zvakaipawo nezvakashata zviri mukati maro.

¹¹Kushata kuri pakati paro; Kumanikidza nokunyengera hazvibvi panzira dzaro.

¹²Nokuti akanga asi muvengi akandishora; Ipapo ndaigona kutsunga; Akanga asi iye aindivenga akazvikudza kwandiri; Ipapo ndaimuvanda.

¹³Asi wakanga uriwe, munhu wakaenzana neni, Shamwari yangu, nomuzikani wangu.

¹⁴Taisirangana zvakanaka, Taifamba mumba maMwari pamwechete navanhu vazhinji.

¹⁵Rufu ngaruvawire kamwe-kamwe, Ngavaburikire kuSheori vari vapenyu; Nokuti kushata kuri paugaro hwavo, imo mukati mavo.

¹⁶Kana ndirini, ndichadana kuna Mwari; Jehovha achandiponesa.

¹⁷Madekwana namangwanani namasikati ndichachema ndichiuura; Iye achanzwa izwi rangu.

¹⁸Wakadzikinura mweya wangu norugare, kukasava nomumwe akaswedera kwandiri; Nokuti vakanga vachirwa neni, vaiva vazhinji.

¹⁹Mwari achanzwa, achavapindura, Iye aripo kare nakare, Nokuti havashanduki, Havatyi Mwari.

²⁰Wakatambanudzira maoko ake kuna vaiva norugare naye; Wakashora sungano yake.

²¹Mashoko omuromo wake akatedza samafuta, Asi kurwa kwakanga kuri pamwoyo pake; Mashoko ake akanga ari manyoro kupfuura mafuta, Kunyange zvakadaro yaiva minondo yakavhomorwa.

²²Kandira mutoro wako pamusoro paJehovha, iye achakusimbisa; Haangatongotenderi akarurama kuti azununguswe.

²³Asi imi Mwari muchavaburusira kugomba rokuparadzwa; Vanhu vanokarira ropa navanonyengera havangapedzi hafu yamazuva avo; Asi ini ndichavimba nemi.