Read Shona Union Version 2002 Mapisarema 56 Bible Online

Mapisarema 56 - Shona Union Version 2002 bible

Mapisarema 56

¹Kumutungamiri wokuimba; nomuimbirwo weNjiva iri mumioki iri kure. Pisarema raDhavhidhi; rwiyo rweMikitami; panguva yaakabatwa navaFirisitia paGati. Ndinzwirei tsitsi, Mwari; nokuti vanhu vanotsvaka kundimedza; Zuva rose vanorwa neni vachindimanikidza.

²Vavengi vangu vanoda kundimedza zuva rose; Nokuti vanorwa neni vachizvikudza vazhinji.

³Panguva yandinotya, Ndichavimba nemi.

⁴MunaMwari ndicharumbidza shoko rake; Ndakavimba naMwari, handingatyi; Nyama ingandiiteiko?

⁵Zuva rose vanoshandura mashoko angu; Mifungo yavo yose inondifungira zvakaipa.

⁶Vanoungana, vanovanda, Vanocherekedza makwara angu, Kana vachivandira mweya wangu.

⁷Vachapukunyuka nenzira yezvakaipa here? Paradzai vanhu nokutsamwa kwenyu, Mwari.

⁸Imi munoverenga madzungairiro angu; Isai misodzi yangu mumudziyo yenyu; Haizi murugwaro rwenyu here?

⁹Ipapo vavengi vangu vachadzokera shure nomusi wandinodana; Ndinoziva chinhu ichi, kuti Mwari ari kurutivi rwangu.

¹⁰MunaMwari ndicharumbidza shoko rake; MunaJehovha ndicharumbidza shoko rake.

¹¹Ndakavimba naMwari, handingatyi; Vanhu vangandiiteiko?

¹²Ndinosungwa nezvandakakupikirai Mwari; Ndichakuvigirai zvipiriso zvokuvonga nazvo.

¹³Nokuti makarwira mweya wangu parufu; Namakumbo angu pakugumburwa. Kuti ndifambe pamberi paMwari Muchiedza choupenyu.