Read Shona Union Version 2002 Mapisarema 57 Bible Online

Mapisarema 57 - Shona Union Version 2002 bible

Mapisarema 57

¹Kumutungamiriri wokuimba; nomuimbirwo weAritasheti. Pisarema raDhavhidhi, rwiyo rweMikitami; panguva yaakatiza Sauro pabako. Ndinzwirei tsitsi, Mwari, ndinzwirei tsitsi; Nokuti mweya wangu unotizira kwamuri; Zvirokwazvo, ndichatizira kumumvuri wamapapiro enyu, Kusvikira njodzi dzapfuura.

²Ndichadanidzira kuna Mwari Wokumusorosoro; Kuna Mwari anondiitira zvose.

³Achatuma mubatsiri ari kudenga, andiponese, Kana iye, anovavarira kundimedza, achindishora; Mwari achatuma tsitsi dzake nezvokwadi yake.

⁴Mweya wangu uri pakati peshumba; Ndinovata pasi pakati pavanopfuta somoto, Ivo vanakomana vavanhu, vana meno anenge mapfumo nemiseve, Uye rurimi rwavo munondo unopinza.

⁵Imi mukudzwe Mwari, pamusoro pokudenga-denga; Kurumbidzwa kwenyu ngakuve kumusoro kwapasi pose.

⁶Vakateyira tsoka dzangu mumbure; Mweya wangu wakakotamiswa; Vakachera hunza pamberi pangu; Vawira mukati mayo vamene.

⁷Mwoyo wangu wakasimba, Mwari, mwoyo wangu wakasimba; Ndichaimba, zvirokwazvo, ndichaimba nziyo dzokurumbidza.

⁸Muka iwe mwoyo wangu, muka iwe mutengeranwa nembira; Ini ndimene ndichamuka mangwanani.

⁹Ndichakuvongai, Ishe, pakati pendudzi dzavanhu; Ndichakuimbirai nziyo dzokurumbidza pakati pavahedheni.

¹⁰Nokuti ngoni dzenyu ihuru kusvikira kudenga-denga, Zvokwadi yenyu inosvikira kudenga rose.

¹¹Imi mukudzwe Mwari, kumusoro kwokudenga-denga; Kurumbidzwa kwenyu ngakuve kumusoro kwapasi pose.