Read Shona Union Version 2002 Mapisarema 58 Bible Online

Mapisarema 58 - Shona Union Version 2002 bible

Mapisarema 58

¹Kumutungamiriri wokuimba; nomuimbirwo weAritasheti. Pisarema raDhavhidhi; rwiyo rweMikitami. Munototaura zvakarurama here, imi vane simba, Munotongera vanakomana vavanhu zvakarurama here?

²Zvirokwazvo, mumwoyo menyu munoita zvakaipa; Munoyerera vanhu pasi pose kumanikidza kwamaoko enyu.

³Vakaipa vakava vatorwa kubva padumbu ramai; Vanotsauka vachangozvarwa, vachireva nhema.

⁴Uturu hwavo hwakafanana nouturu hwenyoka; Vakafanana nechiva chisinganzwi, chinodzivira nzeve yacho;

⁵Chisingateereri izwi ren'anga, Kunyange achiimba nouchenjeri hukuru.

⁶Mwari vhunai meno avo mumuromo mavo; Jehovha gurai meno makuru avana veshumba.

⁷Ngavapwe semvura inoyerera; Kana achishumba nemiseve yake, ngaive seyakagurika.

⁸Ngavafanane nehozhwa inonyakatika ichipera; Segambamwedzi romukadzi risina kuona zuva.

⁹Hari dzenyu dzisati dzanzwa moto neweminzwa, Iye achadzibvisa nachamupupuri nyama igere, nomoto pamwechete.

¹⁰Akarurama achafara kana achiona kutsiva; Achashambidza tsoka dzake muropa ravakaipa.

¹¹Naizvozvo vanhu vachiti, “Zvirokwazvo mubayiro woakarurama uripo; Zvirokwazvo Mwari aripo, anotonga pasi pose.”