Read Shona Union Version 2002 Mapisarema 59 Bible Online

Mapisarema 59 - Shona Union Version 2002 bible

Mapisarema 59

¹Kumutungamiriri wokuimba; nomuimbirwo weAritasheti. Pisarema raDhavhidhi; rwiyo rweMikitami; panguva Sauro yaakatuma vanhu, vakarindira imba yake kuti vamuuraye. Ndirwirei pavavengi vangu, Mwari wangu; Ndiisei pakakwirira kure navanondimukira.

²Ndirwirei pavaiti vezvakaipa, Ndiponesei pavanhu veropa.

³Nokuti tarirai, vanovandira mweya wangu; Vane simba vakaungana kuzorwa neni; Hakuzi nokuda kwokudarika kwangu kana kwezvivi zvangu, Jehovha.

⁴Vanomhanya nokuzvigadzira, ini ndisina mhosva hangu; Mukai mundibatsire, muone.

⁵Iyemi Jehovha, Mwari wehondo, Mwari waIsiraeri, Mukai mushanyire vahedheni vose; Musanzwira tsitsi mudariki upi noupi akaipa.

⁶Vanodzoka madekwana, vanoudza sembwa, Vanopota neguta.

⁷Tarirai, vanodzvova nemiromo yavo; Minondo iri pamiromo yavo; Nokuti vanoti, “Ndianiko anganzwa?”

⁸Asi imi Jehovha muchavaseka; Muchadadira vahedheni vose.

⁹Imi simba rangu, ndichakumirirai; Nokuti Mwari ndiye nhare yangu yakakwirira.

¹⁰Mwari wangu achandichingura netsitsi dzake; Mwari achandionesa kukundwa kwavavengi vangu.

¹¹Musavauraya, kuti vanhu vangu varege kukanganwa; Muvaparadzire nesimba renyu, muvawisire pasi, Ishe nhoo yedu.

¹²Nokuda kwechivi chomuromo wavo, namashoko emiromo yavo, Ngavabatwe pakuzvikudza kwavo, Uye nokuda kwokutuka nenhema dzavanotaura.

¹³Vapedzei nehasha, vapedzei, varege kuzovapo; Ngavazive kuti Mwari anobata ushe pakati paJakobho, Kusvikira kumigumo yenyika.

¹⁴Panguva yamadekwana ngavadzoke, ngavaudze sembwa, Ngavapote-pote neguta.

¹⁵Vachadzungaira vachitsvaka zvokudya, Vachagara usiku hwose kana vasingaguti.

¹⁶Asi ini ndichaimba ndichireva simba renyu; Zvirokwazvo ndicharumbidza tsitsi dzenyu mangwanani; Nokuti makanga muri nhare yangu yakakwirira, Noutiziro hwangu pazuva rokutambudzika kwangu.

¹⁷Ndichakuimbirai nziyo dzokurumbidza, imi simba rangu; Nokuti Mwari ndiye nhare yangu yakakwirira, iye Mwari anondinzwira tsitsi.