Read Shona Union Version 2002 Mapisarema 60 Bible Online

Mapisarema 60 - Shona Union Version 2002 bible

Mapisarema 60

¹Kumutungamiriri wokuimba; nomuimbirwo weShushani Eduti; rwiyo rweMikitami rwaDhavhidhi, kudzidzisa; panguva yaakarwa naAraminaharaimi naAramizobha, Joabhu akadzoka akauraya paMupata woMunyu vaEdhomu vane zviuru zvine gumi nezviviri. Mwari, makatirasha, makatiparadza; Makanga makatsamwa; Haiwa, tidzorei.

²Makabvundisa nyika; makaitsemura; Gadzirai mitswe yayo; nokuti inozununguka.

³Makaratidza vanhu venyu zvinhu zvinorema; Makatinwisa waini inobata.

⁴Makapa vanokutyai mureza, Kuti uratidzwe nokuda kwezvokwadi.

⁵Kuti vadikanwi venyu varwirwe, Tiponesei noruoko rwenyu rworudyi, mutipindure.

⁶Mwari akataura pautsvene hwake, achiti, “Ndichafara kwazvo; Ndichaganhura Shekemu, ndichayera mupata weSukoti.

⁷Gireadhi ndeyangu Manase ndeyangu; Efuremuwo inhawiro yomusoro wangu; Judha ndiyo tsvimbo yangu youshe.

⁸Moabhu ndiwo mudziyo wangu wokushambidzira; Pamusoro peEdhomu ndipo pandichakandira shangu yangu; Iwe Firisitia, pururudza nokuda kwangu.”

⁹Ndianiko achandiisa muguta rakasimba? Ndianiko achandiperekedza ndiende Edhomu?

¹⁰Hamuna kutirasha here, Mwari? Hamubudi Mwari, nehondo dzedu.

¹¹Tibatsirei pamudzivisi wedu; Nokuti kubatsira kwavanhu hakuna maturo.

¹²Muna Mwari tichaita noumhare; Nokuti ndiye achatsika vadzivisi vedu pasi.