Read Shona Union Version 2002 Mapisarema 65 Bible Online

Mapisarema 65 - Shona Union Version 2002 bible

Mapisarema 65

¹Kumutungamiriri wokuimba. Pisarema Rwiyo rwaDhavhidhi. Imi Mwari munofanira kurumbidzwa paZioni; Imi munofanira kuitirwa mhiko.

²Imi vokunzwa munyengetero, Vanhu vose vanofanira kuuya kwamuri.

³Mashoko akaipa ondikunda; Kana kuri kudarika kwedu muchakudzima imi.

⁴Akaropafadzwa munhu wamunosanangura, wamunoswededza kwamuri, Kuti agare pavazhe dzenyu; Isu tichagutiswa nounaki hweimba yenyu, Iyo nzvimbo tsvene yetemberi yenyu.

⁵Mukururama kwenyu munotipindura nezvinhu zvinotyisa, Imi Mwari muponesi wedu; Imi chivimbo chamativi ose apasi, Navari kure pagungwa;

⁶Iye, anoteya makomo nesimba rake; Iye, akasungwa chiuno nesimba;

⁷Iye, unonyaradza kutinhira kwamakungwa, iko kutinhira kwamafungo awo, Nokupopota kwavanhu.

⁸Naivo vagere kumigumo vanotya zviratidzo zvenyu; Munofadza mabudiro amangwanani naamadeko.

⁹Munoshanyira pasi, munopadiridza, Munopafumisa kwazvo; Rwizi rwaMwari ruzere nemvura; Munovagadzirira zviyo, kana magadzira pasi saizvozvo.

¹⁰Munozadza mihoronga yapo kwazvo; Munoenzanisa mipanje yapo; Munopanyorovesa nemvura inopfunha; Munoropafadza zvinomera zvapo.

¹¹Munoshongedza mwaka nekorona younaki hwenyu; Makwara enyu anodonha mafuta.

¹²Anodonha pamafuro erenje; Zvikomo zvinozvisunga nomufaro.

¹³Mafuro akafukidzwa namapoka ezvipfuwo; Uye mipatawo yakafukidzwa nezviyo; Zvinopururudza, zvichiimbawo.