Read Shona Union Version 2002 Mapisarema 66 Bible Online

Mapisarema 66 - Shona Union Version 2002 bible

Mapisarema 66

¹Kumutungamiriri wokuimba. Rwiyo nePisarema. Pururudzai kuna Mwari, imi nyika dzose;

²Imbirai mukurumbira wezita rake; Rumbidzai kudzo yake.

³Itiyi kuna Mwari, “Mabasa enyu anotyisa sei! Vavengi venyu vachazviisa pasi penyu nemhaka youkuru hwesimba renyu.

⁴Pasi pose pachanamata kwamuri, Pachakuimbirai; Vachaimbira zita renyu.”

⁵Uyai, muone mabasa aMwari; Anotyisa pane zvaanoitira vana vavanhu.

⁶Akashandura gungwa rikava nyika yakaoma; Vakayambuka rwizi netsoka; Ipapo takafara maari.

⁷Anobata hushe nokusingaperi nesimba rake; Meso ake anocherekedza ndudzi; Vanomumukira ngavarege kuzvikudza.

⁸Vongai Mwari, imi vanhu, Izwi rokumurumbidza ngarinzwike;

⁹Iye anopa mweya upenyu, Asingatenderi tsoka dzedu kuti dzitedzemuke.

¹⁰Nokuti imi Mwari makatiidza; Makatiidza sezvinoidzwa sirivha.

¹¹Makatipinza pamumbure; Makatitakudza mutoro unorema pazviuno zvedu.

¹²Makafambisa vanhu pamusoro pemisoro yedu; Takapinda nomumoto nemvura; Asi makatibudisa kunzvimbo inezvakawanda.

¹³Ndichapinda mumba menyu nezvipiriso zvinopiswa, Ndichakuitirai mhiko dzangu,

¹⁴Dzakarehwa nemiromo yangu, Dzakataurwa nomuromo wangu pakutambudzika kwangu.

¹⁵Ndichakubayirai zvipiriso zvinopiswa zvezvakakora, Nezvinonhuwira zvamakondohwe; Ndichabayira nzombe pamwechete nembudzi.

¹⁶Uyai munzwe, imi mose munotya Mwari, Ndichakududzirai zvaakaitira mweya wangu.

¹⁷Ndakachema kwaari nomuromo wangu, Akarumbidzwa zvikuru norurimi rwangu.

¹⁸Kana ndikarangarira zvakaipa mumwoyo mangu, Ishe haangandinzwi;

¹⁹Asi zvirokwazvo Mwari akanzwa; Akateerera izwi rokunyengetera kwangu.

²⁰Mwari ngaavongwe, Iye asina kuramba munyengetero wangu, kana kubvisa tsitsi yake kwandiri.