Read Shona Union Version 2002 Mapisarema 68 Bible Online

Mapisarema 68 - Shona Union Version 2002 bible

Mapisarema 68

¹Kumutungamiriri wokuimba. Pisarema raDhavhidhi, norwiyo. Mwari ngaasimuke, vavengi vake ngavaparadzirwe; Vanomuvenga ngavatize pamberi pake.

²Muvadzinge, sokudzingwa kwoutsi; Sokunyauka kwenamo pamoto, Saizvozvo vakaipa ngavapere pamberi paMwari.

³Asi vakarurama ngavafare; ngavafare kwazvo pamberi paMwari; Ngavafare nokufara kukuru.

⁴Imbirai Mwari, imbirai zita rake nziyo dzokurumbidza; Mumugadzirire mugwagwa wakanaka, iye anofamba nengoro napamarenje; Zita rake ndiJehovha; farai kwazvo pamberi pake.

⁵Baba venherera, nomutongi wemhosva dzechirikadzi, Ndiye Mwari paugaro hwake hutsvene.

⁶Vakanga vari voga, Mwari anovagarisa pamhuri; Anobudisira vasungwa kumufaro; Asi vanomumukira vanogara panyika yakaoma.

⁷Mwari, panguva yamakatungamirira vanhu venyu, Panguva yokufamba kwenyu murenje;

⁸Pasi pakabvunda, Kudenga-denga kwakadonha pamberi paMwari; Nairo Sinai rakabvunda pamberi paMwari, iye Mwari waIsiraeri.

⁹Imi Mwari makanisa mvura zhinji, Makasimbisa nhaka yenyu panguva yokuneta kwayo.

¹⁰Ungano yenyu yakagaramo; Imi Mwari makagadzirira varombo zvakanaka zvenyu.

¹¹Ishe akataura shoko, Vakadzi vakaparidza shoko vaiva vazhinji-zhinji.

¹²Madzimambo ehondo anotiza, Mukadzi akasara kumusha ndiye anogovera zvakapambwa.

¹³Kana imi movata pasi pakati pamatanga amakwai, Zvakafanana namapapiro enjiva akafukidzwa nesirivha, Neminhenga yakafukidzwa nendarama tsvuku.

¹⁴Panguva iyo waMasimbaose yaakaparadza madzimambomo, Zvakafanana nokuwa kwechando paZarimoni.

¹⁵Gomo reBhashani igomo raMwari; Gomo reBhashani igomo refu-refu.

¹⁶Imi makomo marefu, munogodorerei Iro gomo rakadikanwa naMwari kuti agare mariri? Jehovha achagara mariri nokusingaperi.

¹⁷Ngoro dzaMwari dzinosvika zviuru zvina makumi maviri, zviuru zvezviuru zvamazana; Ishe ari pakati padzo, sezvaakaita paSinai, panzvimbo tsvene.

¹⁸Makakwira kumusoro, mukatapa vatapwa venyu; Makagamuchira zvipo pakati pavanhu Zvirokwazvo pakati pavakakumukiraiwo, kuti Jehovha Mwari agare navo.

¹⁹Ishe ngaavongwe, iye anotakura mitoro yedu zuva rimwe nerimwe, Iye Mwari muponesi wedu.

²⁰Mwari ndiye Mwari anotirwira; Jehovha Ishe ndiye ane nzira dzokubuda murufu.

²¹Asi Mwari achatema misoro yavavengi vake, Paganda romusoro rine vhudzi romunhu anorambira pakutadza kwake.

²²Ishe akati, “Ndichavadzosa paBhashani, Ndichavadzosazve pagungwa rakadzika;

²³Kuti unyike rutsoka rwako muropa, Kuti ndimi dzembwa dzako dzive nomugove wadzo pavavengi vako.”

²⁴Vakaona mafambiro enyu, Mwari, Mafambiro aMwari wangu, Mambo wangu, achipinda panzvimbo tsvene.

²⁵Vaimbi vakatungamira, varidzi vemitengeranwa vakatevera, Pakati pavasikana vakanga vachiridza makandira.

²⁶Rumbidzai Mwari paungano, Iye Ishe, iyemi vetsime raIsiraeri.

²⁷Bhenjamini muduku, mubati wavo, aripo, Namachinda aJudha navazhinji vavo, Namachinda aZebhuruni, namachinda aNafutari.

²⁸Mwari wako akaraira simba rake; Simbisai, Mwari, izvo zvamakatiitira.

²⁹Nokuda kwetemberi yenyu paJerusaremu Madzimambo achakuvigirai zvipo.

³⁰Tukai chikara chetsanga, Hando zhinji, nemhuru dzendudzi dzavanhu, Vazviwisire pasi petsoka nemari yesirivha; Muparadzire vanhu vanofarira kurwa.

³¹Machinda achabuda Ijipiti; Itiopia ichakurumidza kutambanudza maoko ayo kuna Mwari.

³²Imbirai Mwari, imi ushe hwapasi; Imbirai Ishe nziyo dzokurumbidza.

³³Iye anotasva padenga rokudenga-denga, iro rakare nakare; Inzwai, anobudisa izwi rake, izwi rine simba.

³⁴Ipai Mwari simba; Ukuru hwake huri pamusoro paIsiraeri, Simba rake riri mumakore.

³⁵Imi Mwari munotyisa panzvimbo dzenyu tsvene; Mwari waIsiraeri ndiye anopa vanhu vake simba noushe. Mwari ngaavongwe.