Read Shona Union Version 2002 Mapisarema 69 Bible Online

Mapisarema 69 - Shona Union Version 2002 bible

Mapisarema 69

¹Kumutungamiriri wokuimba; nomuimbirwo weShoshanimi. Pisarema raDhavhidhi. Ndiponesei, Mwari, Nokuti mvura zhinji yasvikira pamweya wangu.

²Ndinonyura munhope yakadzika, pasina pokumira; Ndakasvika pamvura zhinji yakadzika, pandinofukidzwa nenzizi.

³Ndaneta nokuchema kwangu; huro dzangu dzaoma; Meso angu anovava nokurindira Mwari wangu.

⁴Vanondivenga ndisina mhosva vazhinji kupfuura vhudzi romusoro wangu; Avo vanoda kundiparadza vane simba, kunyange vachindivenga ndisina mhosva; Ndakafanira kudzosera zvandinenge ndisina kutora.

⁵Mwari munoziva upenzi hwangu; Mhosva dzangu hadzina kukuvanzirwai.

⁶Ishe Mwari wehondo, vanokurindirai ngavarege kunyadziswa nokuda kwangu; Mwari waIsiraeri, vanokutsvakai ngavarege kuzvidzwa nokuda kwangu.

⁷Nokuti ndakatenda kushorwa nokuda kwenyu; Kunyadza kwakafukidza chiso changu.

⁸Ndakava mutorwa kuhama dzangu, Nomubvakure kuvana vamai vangu.

⁹Nokuti kushingairira imba yenyu kwakandipedza; Nokushora, kwavanokushorai kwakawira pamusoro pangu.

¹⁰Panbuva yokuchema kwangu nokutambudza mweya wangu ndichizvinyima, Ndakashorwa nokuda kwazvo.

¹¹Panguva yandakafuka masaga ndikaaita nguo dzangu. Ndakava shumo pakati pavo.

¹²Vanogara pasuo vanondireva; Ndiri chiimbo chavakabatwa nedoro.

¹³Asi kana ndirini, munyengetero wangu uri kwamuri, Ishe, panguva yakafanira; Mwari, netsitsi dzenyu zhinji Ndipindurei nokuponesa kwenyu kwakatendeka.

¹⁴Ndirwirei munhope, ndirege kunyura; Ndirwirwe kuna vanondivenga, napamvura zhinji yakadzika.

¹⁵Boporodzi remvura rirege kundikunda. Mvura yakadzika irege kundimedza; Gomba rirege kuzarira muromo waro pamusoro pangu.

¹⁶Ndipindurei, Jehovha; nokuti unyoro hwenyu hwakanaka; Ringirai kwandiri nokuda kwetsitsi dzenyu zhinji.

¹⁷Regai kuvanzira muranda wenyu chiso chenyu; Nokuti ndiri pakutambudzika; kurumidzai kundipindura.

¹⁸Swederai kumweya wangu, muudzikinure; Ndidzikinurei nokuda kwavavengi vangu.

¹⁹Munoziva kushorwa kwangu, nokunyadzwa kwangu nokuzvidzwa kwangu; Vadzivisi vangu vose vari mberi kwangu.

²⁰Kushora kwakaputsa mwoyo wangu; ndaremerwa kwazvo; Ndakatsvaka vangandinzwira nyasha, asi kwakanga kusino munhu; Ndatsvaka vavaraidzi, asi handina kuwana nomumwe.

²¹Vakandipa nduru zvive zvokudya zvangu; Pakunzwa nyota kwangu vakandinwisa vhiniga.

²²Tafura yavo ngaive musungo pamberi pavo; Neriva, kana vakagarika havo.

²³Meso avo ngaapofomadzwe, varege kuona, Zviuno zvavo ngazvirambe zvichiguda-guda.

²⁴Dururai kutsamwa kwenyu pamusoro pavo, Hasha dzenyu dzinopfuta, ngadzivabate.

²⁵Ugaro hwavo ngahuparadzwe; Ngakurege kuva nomunhu anogara pamatende avo.

²⁶Nokuti vanotambudza uyo wamakarova; Vanotaura zvokurwadziwa kwavaya vamakakuvadza.

²⁷Wedzerai zvakaipa pazvakaipa zvavo; Ngavarege kupinda pakururama kwenyu.

²⁸Ngavadzimwe parugwaro rwoupenyu, Varege kunyorwa pamwechete navakarurama.

²⁹Asi ini ndiri murombo, ndinorwadziwa; Kuponesa kwenyu, Mwari, ngakundiise pakakwirira.

³⁰Ndicharumbidza zita raMwari norwiyo, Ndichamukudza nokuvonga.

³¹Izvo zvichafadza Jehovha kupfuura nzombe, Kana hando ine nyanga namahwanda.

³²Vanyoro vakazviona vakafara; Imi munotsvaka Mwari, mwoyo yenyu ngairarame.

³³Nokuti Jehovha anonzwa vashaiwi, Haashori vasungwa vake.

³⁴Kudenga napasi ngazvimurumbidze, Makungwa, nezvose zvinopfakanyikamo.

³⁵Nokuti Mwari achaponesa Zioni, nokuvaka maguta aJudha; Vachagaramo, ive nhaka yavo.

³⁶Ichava nhaka yavana vavaranda vake; Vanoda zita rake vachagaramo.