Read Shona Union Version 2002 Mapisarema 7 Bible Online

Mapisarema 7 - Shona Union Version 2002 bible

Mapisarema 7

¹Rwiyo rwaDhavhidhi rwaakaimbira Jehovha nokuda kwamashoko aKushi, muBhenjamini. Jehovha Mwari wangu, ndinovimba nemi; Ndiponesei kuna vose vanonditeverera, mundirwire;

²Kuti arege kubvambura mweya wangu seshumba, Aubvamburanye, ndichishaiwa anondirwira.

³Jehovha Mwari wangu, kana ndichinge ndakaita izvozvi; Kana zvakaipa zvirimo mumaoko angu;

⁴Kana ndichinge ndakaitira zvakaipa munhu aiva noukama neni; (Izvo, ndakarwira waiva mudzivisi wangu asina mhosva;)

⁵Muvengi ngaateverere mweya wangu, aubate; Ngaatsikire upenyu hwangu pasi, Aise kukudzwa kwangu muguruva.

⁶Simukai Jehovha, pakutsamwa kwenyu, Simukirai hasha dzavadzivisi vangu; Mumuke nokuda kwangu; ndimi makaraira kuti zvakarurama zviitwe.

⁷Ungano yendudzi dzavanhu ngaikupoteredzei; Mudzokere kumusoro pamusoro pavo.

⁸Jehovha anotonga ndudzi dzavanhu; Nditongei Jehovha sokururama kwangu, uye nezvokwadi zviri mandiri.

⁹Haiwa, kuipa kwavakaipa ngakugume, asi simbisai akarurama; Nokuti Mwari akarurama anoidza mwoyo netsvo.

¹⁰Nhoo yangu iri kuna Mwari, Iye anoponesa vane mwoyo yakarurama.

¹¹Mwari mutongi akarurama, Zvirokwazvo, ndiMwari unosvotwa zuva rimwe nerimwe.

¹²Kana munhu asingatendeuki, iye acharodza munondo wake; Akakunga uta hwake, akahugadzira.

¹³Akazvigadzirirawo nhumbi dzokuuraya nadzo; Anozviitira miseve inopisa.

¹⁴Tarira, anotambudzika pakubereka zvakaipa; Zvirokwazvo, akava nemimba yezvakashata, akabereka nhema.

¹⁵Akachera hunza, akaidzikisa, Akawira mugomba raakachera iye.

¹⁶Zvakashata zvake zvichadzokera pamusoro wake amene, Uye kumanikidza kwake kuchauya pamusoro pedehenya rake.

¹⁷Ndichavonga Jehovha nokuda kwokururama kwake; Ndichaimbira zita raJehovha Wokumusorosoro.