Read Shona Union Version 2002 Mapisarema 71 Bible Online

Mapisarema 71 - Shona Union Version 2002 bible

Mapisarema 71

¹Jehovha, ndinovimba nemi; Ngandirege kutongonyadziswa.

²Ndirwirei mukururama kwenyu, ndisunungurei; Rerekerai nzeve yenyu kwandiri, mundiponese.

³Ivai dombo rangu mandingagara, kwandingaramba ndichienda; Makaraira kuti ndiponeswe; Nokuti ndimi dombo rangu nenhare yangu.

⁴Ndisunungurei, Mwari wangu, paruoko rwowakaipa, Paruoko rwousina kururama nomunhu anomanikidza.

⁵Nokuti imi, Ishe Jehovha, muri tariro yangu; Ndimi wandinovimba naye kubva pauduku hwangu.

⁶Ndakatsigirwa nemi kubva pachizvaro; Ndimi makandibudisa padumbu ramai vangu; Ndichakurumbidzai.

⁷Ndiri chishamiso kuna vazhinji; Asi imi muri utiziro hwangu hwakasimba.

⁸Muromo wangu uchazadzwa nerumbidzo yenyu, Nekudzo yenyu zuva rose.

⁹Regai kundirasha panguva yokukwegura kwangu; Musandisiya kana ndapera simba.

¹⁰Nokuti vavengi vangu vanondireva; Vanogarira mweya wangu, vanorangana,

¹¹Vachiti, “Mwari amusiya; Teverai, mumubate; nokuti hakuna ungamurwira.”

¹²Mwari, regai kuva kure neni; Mwari wangu, kurumidzai kundibatsira.

¹³Avo vanodzivisa mweya wangu ngavanyadziswe vapere; Vanotsvaka kundikuvadza ngavafukidzwe nokushorwa nokuzvidzwa.

¹⁴Asi ini ndicharamba ndichitarira, Ndicharamba ndichiwedzera kukurumbidzai.

¹⁵Muromo wangu uchareva kururama kwenyu, Nokuponesa kwenyu zuva rose; Nokuti handizivi kuwanda kwazvo.

¹⁶Ndichauya namabasa ane simba aShe aJehovha; Ndichaparidza kururama kwenyu, iko kwenyu kwoga.

¹⁷Mwari, makandidzidzisa kubva paujaya hwangu; Kusvikira zvino ndadudzira mabasa enyu anoshamisa.

¹⁸Haiwa, kusvikira ndakwegura ndachena vhudzi, Mwari regai kundisiya; Kusvikira ndadudzira simba renyu kurudzi runouya, Nesimba renyu kunomumwe nomumwe anozouya.

¹⁹Kururama kwenyuwo, Mwari, kuri kumusoro-soro; Iyemi makaita zvinhu zvikuru, Mwari, ndianiko akafanana nemi?

²⁰Iyemi makatiratidza madambudzo mazhinji akaipa, Ndimi muchatiraramisazve, Nokutikwidzazve tibve pakudzika kwapasi.

²¹Wedzerai hukuru hwangu, Dzokaizve mundinyaradze.

²²Ndichakurumbidzaiwo nemitengeranwa, Naiyo zvokwadi yenyu, Mwari wangu; Ndichakuimbirai imi nziyo dzokurumbidza nembira, Iyemi Mutsvene waIsiraeri.

²³Miromo yangu ichafara kwazvo kana ndichikuimbirai nziyo dzokurumbidza; Nomweya wangu wamakadzikinura.

²⁴Rurimi rwanguo ruchataura zuva rose zvokururama kwenyu; Nokuti vanotsvaka kundikuvadza vanyadziswa, vazvidzwa.