Read Shona Union Version 2002 Mapisarema 72 Bible Online

Mapisarema 72 - Shona Union Version 2002 bible

Mapisarema 72

¹Pisarema raSoromoni. Ipai mambo zvamakatonga, Mwari, Nokururama kwenyu kumwanakomana wamambo.

²Achatongera vanhu venyu nokururama, Navarombo venyu achavaruramisira.

³Makomo nezvikomo achavigira vanhu rugare, nokururama.

⁴Achatongera varombo vavanhu, Achaponesa vana vavashaiwi, Nokupwanya mumanikidzi.

⁵Vachakutyai kana zuva richipo, Uye kana mwedzi uchipo, kusvikira kumarudzi namarudzi.

⁶Achaburuka iye semvura pauswa hwakagurirwa; Semvura inonaya ichidiridza pasi.

⁷Nemisi yake akarurama achakura zvakanaka; Rugare rwakawanda ruchavapo, kusvikira mwedzi waguma.

⁸Achabata ushe kubva pagungwa kusvikira pagungwa, Nokubva paRwizi kusvikira kumigumo yapasi.

⁹Vagere pamarenje vachapfugama pamberi pake; Vavengi vake vachananzva guruva.

¹⁰Madzimambo eTarishishi neezvivi achauya nezvipo; Madzimambo eShebha neSebha vachamuvigira zvipo;

¹¹Zvirokwazvo, madzimambo ose achawira pasi pamberi pake; Ndudzi dzose dzichamushumira.

¹²Nokuti acharwira mushaiwi kana achidanidzira; Nomurombo asina mubatsiri.

¹³Achanzwira nyasha murombo nomushaiwi, Achaponesa mweya yavashaiwi.

¹⁴Achadzikinura mweya yavo pakutambudzika napakumanikidzwa; Ropa ravo richava chinhu chinokosha pamberi pake;

¹⁵Iye achararama, achapiwa ndarama yeShebha; Vanhu vacharamba vachimunyengeterera; Vachamuvonga zuva rose.

¹⁶Kuchava nezviyo zvizhinji pasi pamusoro pamakomo; Zvibereko zvazvo zvichavhunga seRebhanoni; Vanogara paguta vachakura souswa pasi.

¹⁷Zita rake richavapo nokusingaperi; Zita rake richagara riripo panguva yose yokuvapo kwezuva; Vanhu vacharopafadzwa maari; Ndudzi dzose dzichati, “Anomufaro.”

¹⁸Jehovha Mwari, iye Mwari waIsiraeri, ngaarumbidzwe, Iye oga anoita zvinoshamisa.

¹⁹Zita rake rinobwinya ngarirumbidzwe nokusingaperi; Pasi pose ngapazadzwe nokubwinya kwenyu. Ameni, Ameni.

²⁰Minyengetero yaDhavhidhi mwanakomana waJese yapera.