Read Shona Union Version 2002 Mapisarema 73 Bible Online

Mapisarema 73 - Shona Union Version 2002 bible

Mapisarema 73

¹Pisarema raAsafi. Zvirokwazvo Mwari anoitira Isiraeri zvakanaka, Ivo vane mwoyo yakachena.

²Asi kana ndirini, tsoka dzangu dzakanga dzotsauka; Makumbo angu akanga otedzemuka.

³Nokuti ndakanga ndichigodora vana manyawi, Pakuona kwangu kufara kwavakaipa.

⁴Nokuti havatambudziki pakufa kwavo; Asi muviri wavo une simba.

⁵Havana njodzi savamwe vanhu; Havatambudzwi savamwe vanhu.

⁶Saka kuzvikudza kwavo kwakafanana noruketani pamitsipa yavo; Kumanikidza kunovafukidza senguo.

⁷Meso avo anobuda nokukora; Zvavanofunga pamwoyo zvinofashamira;

⁸Vanoseka, vachireva pakuipa kwavo zvinomanikidza vamwe; Vanotaura vachizvikudza.

⁹Vakataurira kudenga nemiromo yavo, Ndimi dzavo dzinofamba-famba pasi.

¹⁰Saka vanhu vake vanodzokera ikoko; Vanosvinirwa mvura zhinji, mukombe uzere.

¹¹Zvino vanoti, “Mwari angaziva seiko? Wokumusorosoro angava nokuziva here?”

¹²Tarirai, ndizvo zvakaita vakaipa; Vanowedzera pfuma yavo vachingogara vasingatamburi.

¹³Zvirokwazvo ndakanatsa mwoyo wangu pasina, Nokushambidza maoko angu ndisina mhosva;

¹⁴Nokuti ndakatambudzwa zuva rose, Ndakarangwa mangwanani ose.

¹⁵Kana ndaiti, ndichataura kudai; Tarirai, ndainyengera rudzi rwavana venyu.

¹⁶Zvino ndakaramba ndichifunga kuti ndizvinzwisise, Asi zvakandiremera kwazvo;

¹⁷Kusvikira ndapinda panzvimbo tsvene yaMwari, Ndikatarira kuguma kwavo.

¹⁸Zvirokwazvo munovaisa panotedza; Munovawisira pasi kuti vaparadzwe.

¹⁹Haiwa, vanoparadzwa kamwe-kamwe! Vanopedzwa chose nezvinotyisa.

²⁰Sezvakarotwa, kana munhu apepuka; Saizvozvo, Ishe, muchashora mufananidzo wavo, kana muchimuka.

²¹Nokuti mwoyo wangu wakachema, Ndakabayiwa patsvo dzangu.

²²Ndakanga ndiri benzi, ndisingazivi chinhu; Ndakanga ndakafanana nemhuka pamberi penyu.

²³Kunyange zvakadaro ndinoramba ndinemi; Makabata ruoko rwangu rworudyi.

²⁴Muchandiperekedza nezano renyu, Ndokuzondigamuchira pakubwinya.

²⁵Ndianiko kudenga, kana musimi? Napasi hapana wandinoda kunze kwenyu.

²⁶Nyama yangu nomwoyo wangu zvinopera; Asi Mwari ndiye dombo romwoyo wangu nomugove wangu nokusingaperi.

²⁷Nokuti tarirai, vari kure nemi vachapera; Makaparadza vose vakakusiyai noupombwe hwavo.

²⁸Kana ndirini, kuswedera pedyo naye ndizvo zvinondifadza; Ishe Mwari ndakamuita nhare yangu, Kuti ndiparidze mabasa enyu ose.