Read Shona Union Version 2002 Mapisarema 74 Bible Online

Mapisarema 74 - Shona Union Version 2002 bible

Mapisarema 74

¹Rwiyo rweMashiri rwaAsafi. Haiwa Mwari, makatirashireiko nokusingaperi? Hasha dzenyu dzinopfungairira makwai amafuro enyu nemhaka yeiko?

²Rangarirai ungano yenyu yamakatenga kare, Yamakadzikinura kuti ruve rudzi rwenhaka yenyu; Gomo reZioni pamakanga mugere.

³Simudzai makumbo enyu muone zvakaparadzwa zvisingaperi, Izvo zvakaipa zvose zvakaitwa navavengi panzvimbo tsvene.

⁴Vadzivisi venyu vakanduruma pakati peungano yenyu; Vakamisa mireza yavo zvive zviratidzo.

⁵Vakafanana navanhu vakasimudza Masanhu mudondo remiti.

⁶Zvino zvose zvakavezwa zvayo Vanozviputsa nedimuro nenyundo.

⁷Vakapisa nzvimbo yenyu tsvene nomoto; Vakashatisa ugaro hwezita renyu vachihuputsira pasi.

⁸Vakati mumwoyo mavo, “Ngativaparadze pamwechete;” Vakapisa nzvimbo dzose pavanounganira Mwari munyika.

⁹Hatichaoni zviratidzo zvedu; Hapachina muporofita; Pakati pedu hapana munhu anoziva kuti zvichasvikira rini.

¹⁰Haiwa Mwari, mudzivisi, achashora kusvikira riniko? Muvengi acharamba achizvidza zita renyu nokusingaperi here?

¹¹Munodzosereiko ruoko rwenyu, irwo ruoko rwenyu rworudyi? Rutambanudzei pachipfuva chenyu, muvapedze.

¹²Kunyange zvakadaro Mwari ndiye Mambo wangu kubva kare, Iye anobata mabasa okuponesa pakati penyika.

¹³Makapamura gungwa nesimba renyu; Makaputsa misoro yezvikara zvegungwa mumvura.

¹⁴Makaputsanya misoro yengwena, Makaipa vanhu vagere murenje kuti ive nyama yavo.

¹⁵Makapamura tsime neboporodzi; Makapwisa nzizi huru.

¹⁶Masikati ndeenyu, nousiku ndohwenyuwo; Ndimi makagadzira chiedza nezuva.

¹⁷Ndimi makatara miganho yose yapasi; Ndimi makaita zhizha nechando.

¹⁸Rangarirai chinhu ichi, kuti muvengi akakuzvidzai, Jehovha, Uye kuti rudzi rwamapenzi rwakamhura zita renyu.

¹⁹Regai henyu kuisa kuchikara mweya wenjiva yenyu; Musakanganwa upenyu hwavarombo venyu.

²⁰Rangarirai sungano; Nokuti nzvimbo dzine rima dzapasi dzizere nougaro hwavamanikidzi.

²¹Haiwa, vanomanikidzwa ngavarege kudzoka vachinyara; Varombo navashaiwi ngavarumbidze zita renyu.

²²Simukai Mwari, muzvireverere mhaka yenyu, Rangarirai kuzvidzwa kwenyu nebenzi zuva rose.

²³Regai kukanganwa izwi ravadzivisi venyu; Bope ravanokumukira rinogara richikwira.