Read Shona Union Version 2002 Mapisarema 76 Bible Online

Mapisarema 76 - Shona Union Version 2002 bible

Mapisarema 76

¹Kumutungamiriri wokuimba; nemitengeranwa. Pisarema raAsafi. Rwiyo. Mwari anozikanwa pakati paJudha; Zita rake iguru pakati paIsiraeri.

²PaSaremiwo ndipo pane tabhenakeri yake, NapaZioni ugaro hwake.

³Ndipo paakavhuna miseve youta; Nenhoo, nomunondo, nokurwa.

⁴Imi munokubwinya, makanaka kwazvo, Kupfuura makomo ezvakapambwa.

⁵Vakatsunga pamwoyo, vakapambwa, vakavata hope dzavo; Pakati pavarume vane simba hakuna akawana maoko ake.

⁶Pakutuka kwenyu, Mwari waJakobho, Ngoro nebhiza zvose zvinobatwa nehope dzorufu.

⁷Imi, iyemi, munofanira kutyiwa; Ndianiko angamira pamberi penyu kana matsamwa?

⁸Makanzwisa vanhu kutonga kwenyu kuchibva kudenga; Pasi pakatya, pakanyarara,

⁹Panguva yokumuka kwaMwari kuzotonga, Kuti aponese vanyoro vose vapasi.

¹⁰Zvirokwazvo, kutsamwa kwavanhu kuchakurumbidzai; Munozvisunga chiuno nokutsamwa kwakasara.

¹¹Pikai, muripire Jehovha Mwari wenyu; Vose vakamupoteredza ngavauye nezvipo kuna iye anofanira kutyiwa;

¹²Iye achagura mweya yamachinda; Anotyisa kwazvo madzimambo apasi.