Read Shona Union Version 2002 Mapisarema 77 Bible Online

Mapisarema 77 - Shona Union Version 2002 bible

Mapisarema 77

¹Kumutungamiriri wokuimba; nomutoo waJedhutuni. Pisarema raAsafi. Ndichadana kuna Mwari nezwi rangu; kuna iye Mwari nezwi rangu, acharerekera nzeve yake kwandiri.

²Pazuva rokutambudzika kwangu ndakatsvaka Ishe; Ruoko rwangu rwakanga rwakatambanudzwa usiku, ndisingaregi; Mweya wangu wakaramba kunyaradzwa.

³Ndinorangarira Mwari, ndokushaiwa mufaro; Ndinofungisisa, mweya wangu ndokuziya.

⁴Hamutenderi meso angu kutsinzina; Ndinotambudzika, handigoni kutaura.

⁵Ndakarangarira mazuva ekare, Makore enguva dzakare-kare.

⁶Ndinozviyeudzira kuimba kwangu pakati pousiku; Ndinotaurirana nomwoyo wangu; Mweya wangu wakanzvera kwazvo.

⁷“Ko Ishe angarasha nokusingaperi? Haachazonzwiri ngoni here?

⁸Ko tsitsi dzake dzaenda chose nokusingaperi? Chipikirwa chake chakakona nokusingaperi here?

⁹Ko Mwari akanganwa kuva nenyasha? Apfigira tsitsi dzake nyoro pakutsamwa kwake here?”

¹⁰Ipapo ndakati, “Ndihwo utera hwangu, Asi ndicharangarira makore oruoko rworudyi rwoWokumusorosoro.”

¹¹Ndichareva zvakaitwa naJehovha; Nokuti ndicharangarira zvishamiso zvenyu zvakare.

¹²Ndichafungisawo basa renyu rose, Nokurangarira zvamakaita.

¹³Nzira yenyu, Mwari, iri panzvimbo tsvene; Ndianiko mwari mukuru, akafanana naiye Mwari?

¹⁴Ndimi Mwari anoita zvishamiso; Makaratidza simba renyu pakati pavanhu.

¹⁵Makadzikinura vanhu venyu noruoko rwenyu, Ivo vanakomana vaJakobho naJosefa.

¹⁶Mvura zhinji yakakuonai, Mwari; Mvura zhinji yakakuonai, ikatya; Pakadzika pakabvunda.

¹⁷Makore akadurura mvura; Denga rose rakabudisa izwi; Miseve yenyu yakafamba-famba kwose.

¹⁸Izwi rokutinhira kwenyu rakanga riri muchamupupuri; Mheni dzakavhenekera nyika; Pasi pakabvunda nokuzununguka.

¹⁹Kufamba kwenyu kwakanga kuri mugungwa, Nenzira dzenyu mumvura zhinji-zhinji, Makwara enyu akanga asingazikanwi.

²⁰Makafambisa vanhu venyu seboka ramakwai, Noruoko rwaMosesi norwaAmoni.