Read Shona Union Version 2002 Mapisarema 78 Bible Online

Mapisarema 78 - Shona Union Version 2002 bible

Mapisarema 78

¹Rwiyo rweMashiri rwaAsafi. Teererai murayiro wangu, imi vanhu vangu; Rerekerai nzeve dzenyu munzwe mashoko omuromo wangu.

²Ndichashamisa muromo wangu nditaure nomufananidzo; Ndichaparidza mashoko akavanzika ekare,

³Zvatakanzwa nezvatakaziva, Nezvatakaudzwa namadzibaba edu.

⁴Hatingazvivanziri vana vavo, Asi tichaudza rudzi runotevera mabasa angarumbidzwa aJehovha, Nesimba rake, namabasa ake, anoshamisa, aakaita.

⁵Nokuti akamutsa chipupuriro pakati paJakobho, Akatema murayiro pakati paIsiraeri, Akazviraira madzibaba edu, Kuti vazvizivise vana vavo;

⁶Kuti rudzi runotevera ruzvizive, ivo vana vachazoberekwa; Ivo vasimuke vazviudze vana vavo;

⁷Kuti tariro yavo ive kuna Mwari, Varege kukanganwa mabasa aMwari, Asi vachengete mirairo yake;

⁸Varege kufanana namadzibaba avo, Rwakanga ruri rudzi rusingateereri, rwakamukira Mwari. Rudzi rwakaramba kururamisa mwoyo yavo, Uye mweya yavo yakanga isinakutendeka kuna Mwari.

⁹Vana vaEfuraimu, kunyange vakanga vakashonga nhumbi dzokurwa nouta, Vakadzokera shure pazuva rokurwa.

¹⁰Havana kuchengeta sungano yaMwari, Vakaramba kufamba nomurayiro wake;

¹¹Vakakanganwa zvaakaita, Namabasa ake akashamisa, aakavaratidza.

¹²Wakaita zvinhu zvinoshamisa pamberi pamadzibaba avo, Panyika yeIjipiti, pasango reZoani.

¹³Wakapamura gungwa, akavayambusa; Akamisa mvura ikafanana nomurwi.

¹⁴Masikatiwo wakavafambisa negore, Nousiku hwose nechiedza chomoto.

¹⁵Wakapamura matombo murenje, Akavanwisa zvakanaka kwazvo sapamvura inobva pakadzika.

¹⁶Akabudisawo hova dzemvura padombo, Akayererisa mvura zhinji yakaita senzizi.

¹⁷Kunyange zvakadaro vakaramba vachimutadzira, Nokumukira Wokumusorosoro murenje.

¹⁸Vakaidza Mwari mumwoyo mavo Vachikumbira zvokudya zvavakanga vachidawo.

¹⁹Zvirokwazvo, vakapopotera Mwari; Vakati, “Mwari angatigadzirira chokudya murenje here?

²⁰Tarirai, akarova dombo, mvura zhinji ikadzutuka, Hova dzakayerera; Ko angapa chingwawo here? Ungavigira vanhu vake nyama here?”

²¹Saka Jehovha akanzwa, akatsamwa; Moto ukaveserwa Jakobho, Kutsamwa kukamukira Isiraeri;

²²Nokuti havana kutenda Mwari, Havana kuvimba nokuponeswa kwake.

²³Kunyange zvakadaro wakaraira denga rose kumusoro, Akazarura mikova yokudenga;

²⁴Akanisa mana pamusoro pavo kuti vadye, Akapa zviyo zvokudenga.

²⁵Vanhu vakadya chingwa chavatumwa; Akavatumira zvokudya kusvikira vaguta.

²⁶Akabudisa mhepo yakabva mabvazuva, ikarira kudenga; Akafambisa mhepo yakabva nyasi nesimba rake.

²⁷Akanisawo nyama pamusoro pavo ikaita seguruva, Neshiri, dzina mapapiro, dzikaita sejecha regungwa;

²⁸Akazviwisira pakati pemisasa yavo, Pose-pose pavakanga vagere.

²⁹Ipapo vakadya, vakaguta kwazvo; Akavapa zvavakanga vachikarira.

³⁰Vakanga vasati vanyaradza kukara kwavo, Zvokudya zvavo zvakanga zvichiri mumiromo yavo,

³¹Kutsamwa kwaMwari kukavamukira, Akauraya vakakoresa pakati pavo, Akaparadza majaya aIsiraeri.

³²Kunyange zvakadaro vakaramba vachitadza, Vakasatenda mabasa ake aishamisa.

³³Saka akapedza mazuva avo panezvisina maturo, Namakore avo panezvinotyisa.

³⁴Zvino akati achivauraya, ipapo vakamubvunza; Vakadzoka, vakashingaira kutsvaka Mwari.

³⁵Vakarangarira kuti Mwari ndiye dombo ravo, NaMwari Wokumusorosoro mudzikinuri wavo.

³⁶Asi vakamubata kumeso nomuromo wavo, Vakamurevera nhema nendimi dzavo.

³⁷Nokuti mwoyo yavo yakanga isina kururama kwaari, Uye vakanga vasina kutendeka pasungano yake.

³⁸Asi iye, zvaakanga ane nyasha huru, akavakanganwira kuipa kwavo, akasavaparadza; Zvirokwazvo, kazhinji akadzora kutsamwa kwake, Akasamutsa hasha dzake dzose.

³⁹Akarangarira kuti vakanga vari nyama bedzi; Nemhepo, inopfuura, isingadzokizve.

⁴⁰Vakamumukira murenje kazhinji sei, Nokumunzwisa shungu mugwengo!

⁴¹Vakapamhidzazve, vakaidza Mwari, Vakadzivisa Mutsvene waIsiraeri.

⁴²Havana kurangarira ruoko rwake, Kana zuva raakavadzikinura pamudzivisi.

⁴³Panguva yaakavaratidza zviratidzo zvake paIjipiti, Nezvishamiso zvake pasango reZoani;

⁴⁴Akashandura nzizi dzavo dzikava ropa, Nehova dzavo, vakakoniwa kunwa mvura yadzo.

⁴⁵Akatuma pakati pavo mapupira enhunzi, dzakavaruma; Namatafi, akavaparadza.

⁴⁶Zvibereko zvavo wakazvipa mhundururu, Zvakabatira akazvipa mhashu.

⁴⁷Akaparadza midzambiringa yavo nechimvuramabwe, Nemionde yavo nechando.

⁴⁸Mombe dzavo akadziisawo pachimvuramabwe, Zvipfuwo zvavo akazviisa pamheni.

⁴⁹Akatuma pakati pavo kutsamwa kwake kukuru, Nehasha neshungu nokutambudza, Rikaita boka ravatumwa vezvakaipa.

⁵⁰Akagadzirira kutsamwa kwake nzira; Haana kubvisa mweya wavo parufu, Asi akaisa upenyu hwavo kuhosha;

⁵¹Akarova matangwe ose paIjipiti, Ivo vokutanga vesimba ravo pamatende aHami;

⁵²Asi akabudisa vanhu vake samakwai, Akavaperekedza murenje seboka rezvipfuwo.

⁵³Akavafambisa vakafara, vakasatya; Asi gungwa rakafukidza vavengi vavo.

⁵⁴Akavasvitsa panyika yake tsvene, Pagomo iri, raakatenga noruoko rwake rworudyi.

⁵⁵Akadzingawo ndudzi pamberi pavo, Akavaganhurira ivo vave nhaka yavo, Akagarisa vaIsiraeri pamatende avo.

⁵⁶Kunyange zvakadaro vakaidza Mwari Wokumusorosoro, vakamumukira, Vakasachengeta zvipupuriro zvake;

⁵⁷Asi vadzoka, vakaita zvinonyengera. Vakatsauka souta hunonyengera.

⁵⁸Nokuti vakamutsa kutsamwa kwake namatunhu avo akakwirira, Vakamutsa godo rake nezvifananidzo zvavo zvakaveziwa.

⁵⁹Zvino Mwari akati achizvinzwa, akatsamwa kwazvo, Akasema Isiraeri kwazvo-kwazvo.

⁶⁰Akabva patabhenakeri yeShiro, Tende raakanga akaisa pakati pavanhu;

⁶¹Akaisa simba rake mukutapwa, Nokubwinya kwake muruoko rwomudzivisi.

⁶²Vanhu vake wakavaisawo kumunondo; Akatsamwira nhaka yake kwazvo.

⁶³Moto wakapedza majaya avo; Vasikana vavo havana kuimbirwa pakuwanikwa kwavo.

⁶⁴Vapristi vavo vakaurawa nomunondo; Chirikadzi dzavo hadzina kuchema.

⁶⁵Ipapo Ishe akapepuka somunhu akanga avete, Semhare inoridza mhere nokuda kwewaini.

⁶⁶Akarova vadzivisi vake, vakadzokera shure; Akavanyadzisa zvisingaperi.

⁶⁷Akarambawo tende raJosefa, Akasanangura rudzi rwaEfuremu.

⁶⁸Asi akasanangura rudzi rwaJudha, Negomo reZioni raakanga achida.

⁶⁹Akavaka nzvimbo yake tsvene senhare dzakakwirira, Sapasi paakateya nokusingaperi.

⁷⁰Akasanangurawo Dhavhidhi muranda wake, Akamubvisa pamatanga amakwai;

⁷¹Akandomutora paaifudza matunzvi aimwisa, Kuti ave mufudzi wavanhu vake Jakobho, naIsiraeri nhaka yake.

⁷²Naizvozvo akavafudza nokururama kwomwoyo wake; Akavaperekedza nouchenjeri hwamaoko ake.