Read Shona Union Version 2002 Mapisarema 79 Bible Online

Mapisarema 79 - Shona Union Version 2002 bible

Mapisarema 79

¹Pisarema raAsafi. Haiwa Mwari, vahedheni vakapinda panhaka yenyu; Vakasvibisa temberi yenyu tsvene; Jerusaremu vakariita dongo.

²Zvitunha zvavaranda venyu vakazvipa shiri dzokudenga zvive zvokudya zvadzo. Uye nyama yavatsvene venyu vakaipa zvikara zvapasi.

³Vakateura ropa ravo pose-pose paJerusaremu semvura; Vakashaiwa anovaviga.

⁴Tava chinhu chinoshorwa navatigere navo, Chinhu chinozvidzwa nechinosekwa navakatipoteredza.

⁵Haiwa Jehovha, mucharamba makatsamwa nokusingaperi kusvikira riniko? Godo renyu richapfuta somoto here?

⁶Dururai hasha dzenyu pamusoro pavahedheni vasingakuziviyi, Napamusoro poushe huzhinji, husingadi zita renyu.

⁷Nokuti vakapedza Jakobho, Vakaparadza ugaro hwake.

⁸Musarangarira kutirova pamusoro pezvakaipa zvamadzibaba edu; Ngoni dzenyu nyoro ngadzikurumidze kusangana nesu; Nokuti taneta kwazvo.

⁹Tibatsirei, Mwari muponesi wedu, nokuda kwomukurumbira wezita renyu; Mutirwire, mudzime zvivi zvedu nokuda kwezita renyu.

¹⁰Vahedheni vacharevereiko, vachiti, “Mwari wavo aripiko?” Kutsihwa kweropa ravaranda venyu, rakateurwa, Ngakuzikanwe pakati pavahedheni pamberi pedu.

¹¹Kugomera kwomusungwa ngakusvike kwamuri; Noukuru hwesimba renyu chengetai vana vorufu;

¹²Mutsivire vagere nesu kanomwe pachipfuva chavo. Kushora kwavakakushorai nako, imi Ishe.

¹³Naizvozvo isu vanhu venyu, namakwai amafuro enyu, Tichakuvongai nokusingaperi; Ticharatidza kurumbidzwa kwenyu kumarudzi namarudzi.