Read Shona Union Version 2002 Mapisarema 89 Bible Online

Mapisarema 89 - Shona Union Version 2002 bible

Mapisarema 89

¹Rwiyo rweMashiri rwaEtani muEzirahi. Ndichaimba ndichireva ngoni dzaJehovha nokusingaperi; Ndichaparidza nomuromo wangu kutendeka kwenyu kumarudzi namarudzi.

²Nokuti ndakati, “Ngoni dzichavakwa nokusingaperi, Muchasimbisa kutendeka kwenyu mukudenga-denga mumene.

³Ndakaita sungano nomusanangurwa wangu, Ndakapika kumuranda wangu Dhavhidhi, ndichiti,

⁴‘Ndichamisa vana vako nokusingaperi, Nokuvaka chigaro chako choushe kusvikira kumarudzi namarudzi.’ ”

⁵Kudenga-denga kucharumbidza zvishamiso zvenyu, Jehovha; Nokutendeka kwenyuwo paungano yavatsvene.

⁶Nokuti ndianiko mudenga rose angaenzaniswa naJehovha? Ndianiko pakati pavanakomana vaMwari akafanana naJehovha?

⁷Iye Mwari anotyiwa zvikuru paungano yavatsvene, Anofanira kutyiwa kupfuura vose vanomupoteredza.

⁸Haiwa, Jehovha, Mwari wehondo, Ndianiko ane simba, akafanana nemi, Jehovha? Kutendeka kwenyu kunokukomberedzai.

⁹Ndimi munobata kuzvikudza kwegungwa; Kana mafungu aro achisimuka, ndimi munoanyaradza.

¹⁰Makaputsanya Rahabhi, somunhu akaurawa; Makaparadzira vavengi venyu noruoko rwenyu rune simba.

¹¹Kudenga-denga ndokwenyu, napasi ndopenyuwo; Nyika nezvose zvayo, ndimi makazviteya.

¹²Kumusoro nenyasi, ndimi makazvisika; Tabhori neHerimoni anofara nezita renyu.

¹³Munoruoko rune simba; Chanza chenyu chine simba, ruoko rwenyu rworudyi rwakasimudzwa.

¹⁴Kururama nokururamisa ndidzo nheyo dzechigaro chenyu choushe; Ngoni nezvokwadi zvinokutungamirirai.

¹⁵Vakaropafadzwa vanhu vanoziva izwi romufaro; Vanofamba, Jehovha, muchiedza chechiso chenyu.

¹⁶Vanofara muzita renyu zuva rose; Vanosimudzwa nokururama kwenyu.

¹⁷Nokuti imi muri kubwinya kwesimba ravo; Runyanga rwedu ruchasimudzwa netsitsi dzenyu.

¹⁸Nokuti nhoo yedu ndeyaJehovha; Namambo wedu ndowoMutsvene waIsiraeri.

¹⁹Panguva iyo makataura navatsvene venyu pakuzviratidza kwenyu, Mukati, “Ndakabatsira mhare; Ndakasimudza mumwe wakasanangurwa pakati pavanhu.

²⁰Ndakawana Dhavhidhi muranda wangu; Ndakamuzodza namafuta angu matsvene;

²¹Chanza changu chichasimbiswa naye; Ruoko rwanguo ruchamusimbisa.

²²Muvengi haangamumanikidzi; Mwanakomana wezvakaipa haangamutambudzi.

²³Ndichaparadza vadzivisi vake pamberi pake, Ndicharova vanomuvenga.

²⁴Asi kutendeka kwangu nengoni dzangu zvichava naye; Runyanga rwake ruchasimudzwa nezita rangu.

²⁵Ndichaisawo ruoko rwake pamusoro pegungwa, Noruoko rwake rworudyi pamusoro penzizi.

²⁶Iye achadana kwandiri, achiti, ‘Ndimi baba vangu, Mwari wangu, nedombo rokuponeswa kwangu.’

²⁷Ndichamuitawo dangwe rangu, Mukuru wamadzimambo apasi.

²⁸Ndichamuchengetera ngoni dzangu nokusingaperi, Sungano yangu icharamba yakasimba kwaari.

²⁹Vana vake ndichavagarisawo nokusingaperi, Chigaro chake choushe chichafanana namazuva okudenga.

³⁰Kana vana vake vakasiya murayiro wangu, Vakasafamba nezvandakatonga;

³¹Kana vakazvidza zvandakatema, Vakasachengeta mirau yangu;

³²Ipapo ndichavaranga neshamhu pamusoro pokudarika kwavo, Uye nokurova pamusoro pokuipa kwavo.

³³Asi handingamutoreri unyoro hwangu chose, Kana kutendera kutendeka kwangu kuitiswa nhema.

³⁴Sungano yangu handingaizvidzi, Kana kushandura chinhu chakabuda pamuromo wangu.

³⁵Ndakapika kamwechete noutsvene hwangu; Handingarevi nhema kuna Dhavhidhi;

³⁶Vana vake vachavapo nokusingaperi, Chigaro chake choushe chichafanana nezuva pamberi pangu.

³⁷Chichasimbiswa nokusingaperi somwedzi, Sechapupu chakatendeka chiri kudenga.”

³⁸Asi imi makarasha nokuramba, Makatsamwira muzodzwa wenyu.

³⁹Makasema sungano yomuranda wenyu; Makazvidza korona yake mukaikandira pasi.

⁴⁰Makaputsa madziro ake ose; Makaita nhare dzake matongo.

⁴¹Vose vanopfuura nenzira vanopamba nhumbi dzake; Wava chinhu chinosekwa navaanogara navo.

⁴²Makasimudza ruoko rworudyi rwavadzivisi vake; Makafadza vavengi vake vose.

⁴³Zvirokwazvo, munodzosa munondo wake unopinza, Hamuna kumusimbisa pakurwa.

⁴⁴Makagumisa kubwinya kwake, Makawisira pasi chigaro chake choushe.

⁴⁵Makatapudza mazuva ohujaya hwake; Makamufukidza nokunyara.

⁴⁶Jehovha, muchazvivanza nokusingaperi kusvikira riniko? Kutsamwa kwenyu kuchapisa somoto kusvikira riniko?

⁴⁷Haiwa, rangarirai kuti nguva yangu ipfupi kwazvo; Kuti makasikira vana vavanhu vose zvinhu zvisina maturo kwazvo!

⁴⁸Ndoupiko munhu angararama akasaona kufa, Angarwira mweya wake pasimba reSheori here?

⁴⁹Ishe, unyoro hwenyu hwakare huripiko, Hwamakapika kuna Dhavhidhi nokutendeka kwenyu here?

⁵⁰Rangarirai, Ishe, kushorwa kwavaranda venyu; Kuti ndinotakura muchipfuva changu kushora kwavanhu vazhinji;

⁵¹Uko kwakashora vavengi venyu nako, Jehovha, Kwavakashora nako makwara omuzodzwa wenyu.

⁵²Jehovha ngaavongwe nokusingaperi. Ameni, zvirokwazvo, Ameni.