Read Shona Union Version 2002 Mapisarema 91 Bible Online

Mapisarema 91 - Shona Union Version 2002 bible

Mapisarema 91

¹Uyo agere panzvimbo yokuvanda yoWokumusorosoro Acharambira pamumvuri wowaMasimbaose.

²Ndichati pamusoro paJehovha, “Ndiye utiziro hwangu nenhare yangu, Iye Mwari wangu, wandinovimba naye.”

³Nokuti iye achakurwira parugombe rwomuteyi weshiri, Napahosha inouraya zvikuru.

⁴Iye achakufukidza nemhinenga yake, Uchatizira pasi pamapapiro ake; Zvokwadi yake inhoo huru neduku.

⁵Haungatyi chinhu chinovhundusa usiku, Kana museve unofurwa masikati;

⁶Kana hosha inofamba murima, Kana kuparadza kunouraya masikati.

⁷Kurutivi rwako kuchawa vane gumi ramazana, Nezana ramazana paruoko rwako rworudyi; Asi hazvingaswederi kwauri.

⁸Uchangozvitarira hako nameso ako, Ukaona mubayiro wavakaipa.

⁹Nokuti imi Jehovha, muri utiziro hwangu! Iwe wakaita Wokumusorosoro ugaro hwako.

¹⁰Hapana chakaipa chingakuwira, Uye hapana hosha ichaswedera patende rako.

¹¹Nokuti iye acharaira vatumwa vake pamusoro pako, Kuti vakuchengete panzira dzako dzose.

¹²Vachakusimudza pamaoko avo, Kuti urege kugumbusa rutsoka rwako pabwe.

¹³Uchatsika pamusoro peshumba nechiva; Mwana weshumba nenyoka uchazvitsikirira pasi.

¹⁴“Zvaakandida, ndichamurwira; Ndichamuisa pakakwirira, nokuti wakaziva zita rangu.

¹⁵Iye achadana kwandiri, ndichamupindura; Ini ndichava naye pakutambudzika; Ndichamurwira, nokumukudza.

¹⁶Ndichamugutsa noupenyu hurefu, Nokumuratidza ruponeso rwangu.”