Read Shona Union Version 2002 Mapisarema 94 Bible Online

Mapisarema 94 - Shona Union Version 2002 bible

Mapisarema 94

¹Jehovha, imi Mwari mutsivi, Imi Mwari mutsivi, penyai.

²Zvisimudzei, imi Mutongi wenyika; Ipai vanozvikudza sezvavakafanira.

³Jehovha, vakaipa vachafara kwazvo kusvikira riniko, Vakaipa vachafara kwazvo kusvikira rini?

⁴Vanongotaura havo, vanotaura vachizvikudza, Vaiti vose vezvakaipa vanoita manyawi.

⁵Vanopwanya vanhu venyu, Jehovha, Vachitambudza nhaka yenyu.

⁶Vanouraya chirikadzi nomweni, Nenherera vanodziuraya.

⁷Vachiti, “Jehovha haazvioni, Mwari waJakobho haazvirangariri.”

⁸Rangarirai imi vasina njere pakati pavanhu; Nemi mapenzi, muchava vakachenjera riniko?

⁹Iye, akasima nzeve, haanganzwi here? Iye, akaumba ziso, haangaoni here?

¹⁰Iye, anoranga vahedheni, haangarairi here? Iye, anodzidzisa vanhu zivo?

¹¹Jehovha anoziva kufunga kwavanhu, Kuti hazvina maturo.

¹²Akaropafadzwa munhu, anorangwa nemi, Jehovha, Iye wamunodzidzisa pamurayiro wenyu;

¹³Kuti mumuzorodzei pamazuva okutambudzika, Kusvikira vakaipa vachererwa gomba.

¹⁴Nokuti Jehovha haangarashi vanhu vake, Uye haangasiyi nhaka yake.

¹⁵Nokuti kutonga kuchadzokera kukururama; Vose vane mwoyo yakarurama vachakutevera.

¹⁶Ndianiko achandirwira pavaiti vezvakaipa? Ndianiko achandibatsira panavanoita zvakaipa?

¹⁷Dai Jehovha aisava mubatsiri wangu, Mweya wangu ungadai wakakurumidza kugara pakati mwii.

¹⁸Panguva yandakati, “Rutsoka rwangu rwotedzemuka;” Ngoni dzenyu, Jehovha, dzakanditsigira.

¹⁹Mundangariro dzangu zhinji mukati mangu Kunyaradza kwenyu kunofadza mweya wangu.

²⁰Chigaro chezvakaipa chingashamwaridzana nemi here, Icho chinofunga kuita zvakashata nemitemo yacho?

²¹Vanounganira upenyu hwowakarurama, Vachipa mhosva ropa risina mhosva.

²²Asi Jehovha ndiye nhare yangu yakasimba; Mwari wangu idombo routiziro hwangu.

²³Achadzosera pamusoro pavo kutadza kwavo, Achavaparadza pakati pokuita kwavo; Jehovha Mwari wedu achavaparadza.