Read Shona Union Version 2002 Mapisarema 96 Bible Online

Mapisarema 96 - Shona Union Version 2002 bible

Mapisarema 96

¹Imbirai Jehovha rwiyo rutsva; Imbirai Jehovha, pasi pose.

²Imbirai Jehovha, rumbidzai zita rake; Paridzai kuponesa kwake zuva rimwe nerimwe.

³Dudzirai kubwinya kwake pakati pavahedheni, Mabasa ake, anoshamisa pakati pendudzi dzose.

⁴Nokuti Jehovha mukuru, anofanira kurumbidzwa kwazvo; Anofanira kutyiwa kupfuura vamwari vose.

⁵Nokuti vamwari vose vendudzi zvifananidzo hazvo; Asi Jehovha akaita kudenga-denga.

⁶Kukudzwa noumambo zviri pamberi pake; Simba nokunaka zviri panzvimbo yake tsvene.

⁷Ipai Jehovha, imi mhuri dzavanhu, Ipai Jehovha kukudzwa nesimba.

⁸Ipai Jehovha kukudzwa kunofanira zita rake; Uyai nechipiriso, mupinde muvazhe dzake.

⁹Namatai kuna Jehovha nenguva tsvene; Pasi pose bvunda pamberi pake.

¹⁰Itiyi pakati pavahedheni, “Jehovha ndiye anobata hushe; Nyikawo yakasimbiswa, kuti irege kuzununguswa; Iye achatonga vanhu zvakarurama.”

¹¹Kudenga-denga ngakufare, kwazvo; Gungwa ngaritinhire, nezvose zviri mukati maro;

¹²Sango ngarive nomufaro, nezvose zviri mukati maro; Ipapo miti yose yedondo ichaimba nomufaro;

¹³Pamberi paJehovha, nokuti anouya; Nokuti anouya kuzotonga pasi; Achatonga nyika zvakarurama, Nendudzi nokutendeka kwake.