Read Shona Union Version 2002 Zvirevo 10 Bible Online

Zvirevo 10 - Shona Union Version 2002 bible

Zvirevo 10

¹Zvirevo zvaSoromoni. Mwanakomana, akachenjera, anofadza baba; Asi mwanakomana benzi anoshuwisa mai vake.

²Pfuma yakawanikwa nezvakaipa haibatsiri chinhu; Asi kururama kunorwira parufu.

³Jehovha haangatenderi mweya wowakarurama kuti unzwe nzara; Asi kupanga kwavakaipa unokusundira kure.

⁴Anobata noruoko rusine hanya, achava murombo; Asi ruoko rweasina usimbe runopfumisa.

⁵Anounganidza muzhezha, ndiye mwanakomana wakachenjera; Asi anovata hope mukukohwa, mwanakomana anonyadzisa.

⁶Mikomborero iri pamusoro wowakarurama; Asi muromo wowakaipa unovanza kumanikidza.

⁷Kuyeukwa kwowakarurama kunovigira kuropafadzwa, Asi zita rowakaipa richaora.

⁸Ane mwoyo wakachenjera, achagamuchira mirairo; Asi ane miromo youpenzi achawisirwa pasi.

⁹Anofamba zvakarurama, anofamba zvakasimba; Asi anominamisa nzira dzake, achazikanwa.

¹⁰Anochonya neziso rake, anouyisa madambudzo; Asi ane miromo youpenzi, achawisirwa pasi.

¹¹Muromo wowakarurama itsime roupenyu; Asi muromo wowakaipa unovanza kumanikidza.

¹²Mbengo dzinomutsa kukakavara; Asi rudo runofukidza kudarika kwose.

¹³Pamiromo yeane njere panowanikwa uchenjeri; Asi shamhu yakafanira musana woanoshaiwa njere.

¹⁴Vakachenjera vanozvichengetera zivo; Asi muromo webenzi uri pedyo nokuparadzwa.

¹⁵Pfuma yomupfumi ndiro guta rake rakasimba; Zvinoparadza varombo ndihwo urombo hwavo.

¹⁶Zvaakabatira zvinoisa wakarurama kuupenyu; Zvakawanikwa nowakaipa zvinoisa kuzvivi.

¹⁷Anoterera kurairirwa, ari panzira youpenyu; Asi anoramba kurairwa, anotsausa vamwe.

¹⁸Anovanza kuvenga, ane miromo yenhema; Ana makuhwa, ibenzi.

¹⁹Kudarika hakungakoni pamunhu ana mashoko mazhinji; Asi anodzora miromo yake, ano huchenjeri.

²⁰Rurimi rwowakarurama rwakafanana nesirivha yakasarurwa; Mwoyo wowakaipa haubatsiri chinhu.

²¹Miromo yowakarurama inosimbisa vazhinji; Asi mapenzi anofa nokushaiwa zivo.

²²Kuropafadza kwaJehovha ndiko kunopfumisa; Kutambura pabasa hakuwedzeri chinhu.

²³Benzi rinoti kuita zvakaipa kutamba; Ndizvo zvinoitawo uchenjeri kuno ane njere.

²⁴Zvinotyiwa nowakaipa, ndizvo zvichamuwira; Asi wakarurama achapiwa zvaanoda.

²⁵Kana chamupupuri chapfuura, wakaipa haachipo; Asi wakarurama ane nheyo dzisingaperi.

²⁶Sezvinoita vhininga pameno, noutsi pameso, Ndizvo zvakaita simbe kuna vanomutuma.

²⁷Kutya Jehovha kunowedzera mazuva; Asi makore owakaipa achatapudzwa.

²⁸Tariro yavakarurama mufaro; Asi kutarira kwavakaipa kuchaparadzwa.

²⁹Nzira yaJehovha inhare kunowakarurama; Asi ndiko kuparadzwa kuna vanoita zvakaipa.

³⁰Wakarurama haangatongozununguswi nokusingaperi; Asi vakaipa havangarambi vagere panyika.

³¹Muromo wowakarurama unobudisa uchenjeri; Asi rurimi rune nhema ruchabviswa.

³²Miromo yowakarurama inoziva zvinofadza; Asi muromo wowakaipa unotaura zvine nhema.