Read Shona Union Version 2002 Zvirevo 11 Bible Online

Zvirevo 11 - Shona Union Version 2002 bible

Zvirevo 11

¹Chiyero chinonyengedzera chinonyangadza kuna Jehovha; Asi kurema kwakakwana kunomufadza.

²Kana kuzvikudza kuchisvika, kunyadziswa kwasvikawo; Asi uchenjeri huri kuna vanozvininipisa.

³Kusanyengedzera kwavakarurama kuchavatungamirira; Asi kusarurama kwavanonyengedzera kuchaparadza.

⁴Pfuma haibatsiri chinhu nezuva rokutsamwa; Asi kururama kunorwira parufu.

⁵Kururama kwowakakwana kucharuramisa nzira yake; Asi wakaipa uchawiswa nezvakaipa zvake.

⁶Kururama kwavakarurama kuchavarwira; Asi vanonyengedzera vachabatwa nezvakashata zvavo.

⁷Kana munhu wakaipa achifa, zvaanotarira zvichaparadzwa; Tariro yavakashata inoparadzwa.

⁸Wakarurama anorwirwa pakutambudzika; Wakaipa anopinda pachigaro chake.

⁹Wakashata anoparadza wokwake nomuromo wake; Asi wakarurama acharwirwa nezivo.

¹⁰Kana vakarurama vachipfuurira mberi zvakanaka, guta rinofara kwazvo; Kana vakaipa vachiparadzwa, kunopururudzwa.

¹¹Nokuropafadzwa kwavakarurama guta rinokudzwa; Asi rinoputswa nemiromo yavakaipa.

¹²Anoninipisa wokwake anoshaiwa uchenjeri; Asi munhu ane njere anoramba anyerere.

¹³Anofamba ana makuhwa, anobudisa zvakavanda; Asi ano mwoyo wakatendeka, anofukidza mhaka.

¹⁴Kana vanhu vasingatungamirirwi nouchenjeri, vanoderera; Asi pavarairiri vazhinji ndipo pano ruponeso.

¹⁵Wakazviita rubatso pamusoro pomutorwa, achaona nhamo nokuda kwazvo; Asi anovenga kuzviita rubatso, ndiye wakasimba.

¹⁶Mukadzi muuya anokudzwa; Vakasimba vanochengeta pfuma dzavo.

¹⁷Munhu ane ngoni, anoitira mweya wake zvakanaka; Asi asina tsitsi anotambudza nyama yake.

¹⁸Wakaipa anopiwa mubayiro wokunyengedzera; Asi anokusha kururama achawana mubayiro wazvokwadi.

¹⁹Kururama kwazvokwadi kunoisa kuupenyu; Asi anotevera zvakaipa, anovinga rufu rwake.

²⁰Vane mwoyo yakatsauka vanonyangadza Jehovha; Asi vanofamba nenzira yakarurama vanomufadza.

²¹Zvirokwazvo, wakaipa haangakoni kurohwa; Asi vana vavakarurama vacharwirwa.

²²Sezvakaita chindori chendarama mumhino dzenguruve, Ndizvo zvakaita mukadzi wakanaka kumeso asina kungwara.

²³Zvinodikanwa navakarurama zvakanaka bedzi; Asi vakaipa vanomirirwa nokutsamwa.

²⁴Mumwe ariko anoparadzira, achiwedzerwa; Uye ariko anonyima zvaakafanira kupa, asi zvinongomushaisa.

²⁵Chipavurire achakodzwa; Uye anodiridza achadiridzwawo.

²⁶Unonyima zviyo, vanhu vachamutuka; Asi mikomborero ichava pamusoro woanozvitengesa.

²⁷Anoshingairira zvinhu zvakanaka, anotsvaka zvinofadza; Asi anotsvaka zvakashata, achasvikirwawo nazvo.

²⁸Anovimba nepfuma yake, achawa; Asi vakarurama vachanaka seshizha nyoro.

²⁹Anotambudza imba yake, achagara nhaka yemhepo; Benzi richava muranda woano mwoyo wakachenjera.

³⁰Zvibereko zvowakarurama muti womupenyu; Unobata mweya yavanhu ndiye wakachenjera.

³¹Tarirai, wakarurama achapiwa mubayiro panyika; Ndoda wakaipa nomutadzi!