Read Shona Union Version 2002 Zvirevo 12 Bible Online

Zvirevo 12 - Shona Union Version 2002 bible

Zvirevo 12

¹Anoda kurairirwa, anoda zivo; Asi anovenga kurairwa ibenzi.

²Munhu akanaka achawana nyasha kuna Jehovha, Asi achapa mhosva munhu ana mano akaipa.

³Munhu haangasimbiswi nezvakaipa; Asi mudzi wowakarurama haungazununguswi.

⁴Mukadzi anoita zvakanaka, ikorona yomurume wake; Asi anonyadzisa, wakaita sezvakaora pamapfupa ake.

⁵Mifungo yowakarurama yakarurama; Asi mano avakaipa anonyengedzera.

⁶Mashoko avakaipa ndookuvandira ropa; Asi muromo wavakarurama uchavarwira.

⁷Vanhu vakaipa vanotsindikirwa, havachipo; Asi imba yavakarurama icharamba imire.

⁸Munhu acharumbidzwa zvakaenzana nouchenjeri hwake; Asi ane mwoyo akatsauka, achazvidzwa.

⁹Munhu anoninipiswa, ane muranda hake, Anopfuura anozvikudza, asina zvokudya.

¹⁰Akarurama ane hanya noupenyu hwechipfuwo chake; Asi tsitsi dzowakaipa ihasha.

¹¹Anorima munda wake, achava nezvokudya zvizhinji; Asi anotevera zvisina maturo, anoshaiwa njere.

¹²Akaipa anopanga zvaangapamba kuna vakashata; Asi mudzi wavakaipa unobereka zvibereko.

¹³Pakudarika kwemiromo panomusungo wavakaipa; Asi akarurama achabuda panhamo.

¹⁴Munhu achagutiswa nezvakanaka zvinobva pazvibereko zvomuromo wake; Uye munhu achadzoserwa zvaakaita namaoko ake.

¹⁵Nzira yebenzi yakanaka pakuona kwake; Asi akachenjera anoteerera kana achirairwa.

¹⁶Kutsamwa kwebenzi kunozikanwa pakarepo; Asi akachenjera anovanza kunyadziswa kwake.

¹⁷Munhu anoreva zvokwadi, anoparidza zvakarurama; Asi chapupu chenhema chinoparidza kunyengedzera.

¹⁸Mumwe ariko anotaura nokusarangarira zvinobaya somunondo; Asi rurimi rwowakachenjera runoporesa.

¹⁹Muromo wezvokwadi uchasimbiswa nokusingaperi; Asi rurimi rune nhema runongogara chinguva chiduku.

²⁰Kunyengedzera kuri mumwoyo yavanofunga mano akaipa, Asi vanorairira zvorugare vanomufaro.

²¹Akarurama haangatongowirwi nechakaipa; Asi vakaipa vachazadzwa nezvakashata.

²²Miromo, ine nhema, inonyangadza Jehovha; Asi vanoita nokutendeka vanomufadza.

²³Munhu akachenjera anovanza zivo; Asi mwoyo yamapenzi inoparidza upenzi.

²⁴Ruoko rwavasine usimbe ruchabata ushe; Asi vane usimbe vachabatiswa chibharo.

²⁵Kutambudzika pamwoyo womunhu kunouremedza; Asi shoko nyoro rinoufadza.

²⁶Akarurama anoperekedza wokwake zvakanaka; Asi nzira yowakaipa inovarashisa.

²⁷Simbe haibati mhuka yayamutsa, Asi kusava neusimbe ipfuma yomunhu.

²⁸Panzira yakarurama ndipo panoupenyu; Kwainoenda hakuna rufu.