Read Shona Union Version 2002 Zvirevo 13 Bible Online

Zvirevo 13 - Shona Union Version 2002 bible

Zvirevo 13

¹Mwanakomana akachenjera anoteerera kuraira kwababa vake; Asi mudadiri haanzwi kana achitukwa.

²Munhu achadya zvakanaka zvinobva pazvibereko zvomuromo wake; Asi vanoita nokunyengedzera vanofarira kumanikidza.

³Anorindira muromo wake, anochengeta hupenyu hwake; Asi anoshamisa miromo yake, achaparadzwa.

⁴Mweya wesimbe unopanga, asi unoshaiwa; Asi mweya yavasina usimbe ichakodzwa.

⁵Akarurama anovenga nhema; Asi akaipa, anonyangadza, achanyadziswa.

⁶Kururama kunochengeta akarurama pakufamba kwake; Asi kuipa kunowisira mutadzi pasi.

⁷Mumwe ariko anozviti ndiri mupfumi, kunyange asina chinhu; Mumwe ariko unozviti ndiri murombo, asi ane pfuma zhinji.

⁸Rudzikinuro rwoupenyu hwomunhu ipfuma yake; Asi murombo haanzwi kutyisidzira.

⁹Chiedza chavakarurama chinopenya kwazvo; asi mwenje wavakaipa uchadzimwa.

¹⁰Kuzvikudza kunongouyisa kukakavara; Asi uchenjeri huri kuna vanotenda kurairirwa.

¹¹Pfuma, yakawanikwa nokukurumidza, ichatapudzwa; Asi anounganidza noruoko, zvichawedzerwa kwaari.

¹²Tariro kana ichinonoka, inoodza mwoyo; Asi kana chapangwa chosvika, ndiwo muti woupenyu.

¹³Anozvidza Shoko, asungwa naro; Asi anotya murayiro, achapiwa mubayiro.

¹⁴Kudzidzisa kwowakachenjera itsime roupenyu; Kuti munhu apukunyuke pamisungo yorufu.

¹⁵Njere dzakanaka dzinouyisa kufarirwa navanhu; Asi nzira yavatadzi ihukutu.

¹⁶Mumwe nomumwe, akangwara, anoita nokuziva, Asi benzi rinokusha upenzi hwarwo.

¹⁷Nhume yakaipa inowira munjodzi; Asi munyai anotendwa anoporesa.

¹⁸Urombo nokunyadziswa ndiwo mubayiro woanoramba kurairirwa; Asi anoteerera kurairwa achakudzwa.

¹⁹Kana zvinodikanwa zvaitwa, zvinozipa pamweya; Asi mapenzi anonyangadzwa kana achisiyana nezvakashata.

²⁰Fambidzana navakachenjera, ugova akachenjerawo; Asi shamwari yamapenzi inoshatiswa.

²¹Zvakaipa zvichatevera vatadzi; Asi vakarurama vacharipirwa nezvakanaka.

²²Munhu, akanaka, achasiyira vana vavana vake nhaka; Asi pfuma yomutadzi inochengeterwa akarurama.

²³Munda womurombo ane zvokudya zvizhinji; Asi mumwe ariko anoparadzwa nokuda kwokusarurama.

²⁴Anorega shamhu anovenga mwanakomana wake; Asi anomuda, anomuranga zvakanaka.

²⁵Akarurama anodya kusvikira agutisa mweya wake; Asi dumbu rowakaipa richashaiwa.