Read Shona Union Version 2002 Zvirevo 14 Bible Online

Zvirevo 14 - Shona Union Version 2002 bible

Zvirevo 14

¹Mukadzi mumwe nomumwe akachenjera anovaka imba yake; Asi benzi rinoiputsa namaoko aro.

²Anofamba nokururama kwake, anotya Jehovha; Asi akatsauka panzira dzake, anomudzidza.

³Mumuromo webenzi mune shamhu yamanyawi; Asi miromo yavakachenjera inovachengeta.

⁴Kana pasina nzombe, chidyiro hachine chiro; Asi zvibereko zvizhinji zvinouya nesimba renzombe.

⁵Chapupu, chakatendeka, hachirevi nhema; Asi chapupu chenhema chinobudisa mashoko enhema.

⁶Mudadi anotsvaka uchenjeri, asi hahupo; Asi zivo haitani kuwanikwa navane njere.

⁷Ibva pamberi pebenzi, Nokuti haungawani miromo yezivo kwaari.

⁸Uchenjeri hwomunhu akangwara ndiko kunzwisisa nzira yake; Asi hupenzi hwamapenzi hunonyengedzera.

⁹Chibayiro chezvivi chamapenzi chinodadira; Asi pakati pavakarurama panokufarirana.

¹⁰Mwoyo mumwe nomumwe unoziva kutambudzika kwawo; Mweni haangagoverani nomufaro wawo.

¹¹Imba yowakaipa ichaparadzwa; Asi tende rowakarurama richafara zvakanaka.

¹²Munhu anoona nzira achiti yakarurama; Asi kuguma kwayo inzira dzorufu.

¹³Kunyange munhu angaseka hake, mwoyo ungava neshungu; Kuguma kwomufaro ndiko kuchema.

¹⁴Ano mwoyo, anodzokera shure, achagutiswa nenzira dzake; Asi munhu akanaka achagutiswa nezvinobva maari.

¹⁵Asina mano anotenda mashoko ose; Asi akangwara anongwarira mafambiro ake.

¹⁶Akachenjera anotya zvakashata, achizvinzvenga; Asi benzi rina manyawi, richizvitenda.

¹⁷Anokurumidza kutsamwa, achaita noupenzi; Uye munhu, anofunga mano akaipa, achavengwa.

¹⁸Vasina mano vanogara nhaka yohupenzi; Asi vakangwara vachadzikwa korona yezivo.

¹⁹Vakashata vanogwadama pamberi pavakanaka; Navakaipa pamasuo avakarurama.

²⁰Murombo anovengwa kunyange nowokwake; Asi shamwari dzavapfumi izhinji.

²¹Anoshora wokwake, anotadza; Asi ane tsitsi navarombo, ane mufaro.

²²Ko vanofunga zvakaipa havarashiki here? Asi nyasha nezvokwadi ndezvavanofunga zvakanaka.

²³Kubata kwose kune batsiro; Asi kungotaura nemiromo kunobereka kushaiwa.

²⁴Korona yavakachenjera ipfuma yavo; Asi upenzi hwamapenzi upenzi zvahwo.

²⁵Chapupu chakatendeka chinoponesa mweya yavanhu; Asi anoreva nhema anonyengedzera.

²⁶Pakutya Jehovha pane simbiso kwazvo; Vana vowakadai vachava noutiziro.

²⁷Kutya Jehovha itsime roupenyu; Kuti munhu apukunyuke pamisungo yorufu.

²⁸Ukuru hwamambo hunoonekwa pakuwanda kwavanhu; Asi kuparadzwa kwashe kuri pakushaiwa vanhu.

²⁹Ano mwoyo murefu ane njere kwazvo; Asi anokurumidza kutsamwa anowedzera upenzi.

³⁰Mwoyo wakagadzikana ndihwo upenyu hwomuviri; Asi godo rinoodza mapfupa.

³¹Anomanikidza murombo, anozvidza Muiti wake; Asi ane tsitsi nomushaiwi, anomukudza.

³²Akaipa anowiswa pasi mukutadza kwake; Asi akarurama ane tariro pakufa kwake.

³³Uchenjeri hunogara pamwoyo weane njere; Asi zviri mukati mamapenzi zvinozikanwa.

³⁴Kururama kunokurisa rudzi; Asi zvivi zvinonyadzisa kurudzi rupi norupi.

³⁵Mambo anofarira muranda, anoita nokuchenjera; Asi anonyadzisa achatsamwirwa naye.