Read Shona Union Version 2002 Zvirevo 15 Bible Online

Zvirevo 15 - Shona Union Version 2002 bible

Zvirevo 15

¹Mhinduro nyoro inodzora kutsamwa; Asi shoko rinorwadza mwoyo rinomutsa hasha.

²Rurimi rwovakachenjera runobudisa zivo kwadzo; Asi muromo wamapenzi unodurura upenzi.

³Meso aJehovha ari pose-pose; Achicherekedza vakaipa navakanaka.

⁴Rurimi runyoro muti woupenyu; Asi rune nhema runoputsa mweya.

⁵Benzi rinoramba kurairira kwababa varo; Asi une hanya nokurairwa, ndiye ane njere.

⁶Mumba mowakarurama mune pfuma zhinji; Asi kutambudzika kuri munezvinowanikwa nowakaipa.

⁷Miromo yavakachenjera inokusha zivo; Asi mwoyo wamapenzi haudaro.

⁸Chibayiro chavakaipa chinonyangadza Jehovha; Asi munyengetero wowakarurama unomufadza.

⁹Nzira yowakaipa inonyangadza Jehovha; Asi anoda munhu anotevera kururama.

¹⁰Kurangwa kwakaipa kunovinga munhu anosiya nzira; Anovenga kurairwa achafa.

¹¹Sheori noKuparadza zviri pamberi paJehovha; Ndoda mwoyo yavana vavanhu.

¹²Mudadi haadi kurairwa; Anoramba kuenda kunowakachenjera.

¹³Mwoyo, wakafara, unofadza chiso; Asi mweya unoputsa nomwoyo une shungu.

¹⁴Mwoyo woane njere unotsvaka zivo; Asi muromo wamapenzi unogutiswa noupenzi.

¹⁵Mazuva ose omunhu, uri pakutambudzika, akaipa; Asi anomwoyo wakafara anomutambo nguva dzose.

¹⁶Zviri nani kuti munhu ave nezvishoma, achitya Jehovha, Pakuti ave nepfuma yakawanda, achinyunyuta.

¹⁷Zviri nani kuti munhu ave nezvokudya zvemiriwo, rudo ruripo, Pakuti ave nenzombe yakakodzwa, panembengo.

¹⁸Munhu, ane hasha, anomutsa kukakavara; Asi anomwoyo murefu anonyaradza gakava.

¹⁹Nzira yesimbe yakaita soruzhowa rweminzwa; Asi nzira yavakarurama yakagadzirwa.

²⁰Mwanakomana akachenjera anofadza baba; Asi benzi rinoshora mai varo.

²¹Upenzi hunofadza munhu anoshaiwa uchenjeri; Asi munhu wenjere anofamba achirurama.

²²Pasingaranganwi mano anokona; Asi kuna varairi vazhinji ndokwaanosimbiswa.

²³Munhu anofadzwa nemhinduro yakarurama yomuromo wake; Uye shoko, rinotaurwa nenguva yakafanira, rakanaka sei!

²⁴Nzira youpenyu yowakarurama inokwira kumusoro; Kuti apukunyuke paSheori pasi.

²⁵Jehovha achaparadza imba yavanozvikudza; Asi muganho wechirikadzi anousimbisa.

²⁶Mano akashata anonyangadza Jehovha; Asi mashoko akachena anomufadza.

²⁷Anokarira pfuma, anotambudza imba yake; Asi anovenga zvipo, achararama.

²⁸Mwoyo wowakarurama unombofunga chaangapindura; Asi muromo wowakaipa unodurura zvakaipa.

²⁹Jehovha ari kure navakaipa; Asi anonzwa munyengetero wavakarurama.

³⁰Meso anobwinya anofadza mwoyo; Mashoko akanaka, anobva kumwe, anokodza mapfupa.

³¹Nzeve, inoteerera kuraira, kunoisa kuupenyu, Ichagara pakati pavakachenjera.

³²Anoramba kurairwa, anoshora mweya wake; Asi anoteerera kurairwa, anowana njere.

³³Kutya Jehovha kunodzidzisa uchenjeri; Uye kuzvininipisa kunotangira kukudzwa.