Read Shona Union Version 2002 Zvirevo 16 Bible Online

Zvirevo 16 - Shona Union Version 2002 bible

Zvirevo 16

¹Kurangarira kwomwoyo ndokwomunhu; Asi mhinduro yorurimi inobva kuna Jehovha.

²Nzira dzose dzomunhu anoti dzakanaka pakuona kwake; Asi Jehovha anoyera zvinangwa.

³Isa mabasa ako ose kuna Jehovha, Zvawakarangarira zvigoitika.

⁴Jehovha akaitira chinhu chimwe nechimwe basa racho; Zvirokwazvo kunyange nowakaipa akaitirwa zuva rezvakashata.

⁵Mumwe nomumwe, anomwoyo unozvikudza, anonyangadza Jehovha; Zvirokwazvo, haangakoni kurohwa.

⁶Zvakaipa zvinodzikinurwa nenyasha nezvokwadi; Nokutya Jehovha vanhu vanobva pane zvakashata.

⁷Kana nzira dzomunhu dzichifadza Jehovha, Anomuyananisira kunyange namapfumo ake.

⁸Zviri nani kuva nezvishoma nokururama, Pakuva nepfuma zhinji nokusarurama.

⁹Mwoyo womunhu anozvifungira nzira yake; Asi Jehovha anorairira kufamba kwake.

¹⁰Miromo yamambo inotema zvirevo zvazvokwadi; Muromo wake haungaposhi pakutonga.

¹¹Chiyero nechienzaniso, chisinganyengeri, chinobva kuna Jehovha; Zviidzo zvose zvehombodo ibasa rake.

¹²Zvinonyangadza kana madzimambo achiita zvakaipa; Nokuti chigaro choushe chinosimbiswa nokururama.

¹³Madzimambo anofadzwa nemiromo yakarurama; Anotaura zvinhu zvakarurama anodikanwa naye.

¹⁴Kutsamwa kwamambo kwakaita senhume dzorufu; Asi munhu akachenjera anokunyaradza.

¹⁵Upenyu huri pakubwinya kwechiso chamambo; Kana achifara munhu zvakaita segore remvura yokupedzisira.

¹⁶Kuwana uchenjeri kunokunda sei kuwana ndarama; zviri nani kutsaura kuwana njere pakuwana sirivha.

¹⁷Mugwagwa, wakapfumba, wavakarurama ndiko kubva pane zvakaipa; Anochenjerera nzira yake anochengeta mweya wake.

¹⁸Kuzvikudza kunotangira kuparadzwa; Uye mweya wamanyawi unotangira kuwa.

¹⁹Zviri nani kuva nomweya unozvininipisa pakati pavarombo, Pakugovana zvakapambwa navanozvikudza.

²⁰Anoteerera Shoko, achawana zvakanaka; Anovimba naJehovha, ano mufaro.

²¹Ano mwoyo wakachenjera achanzi akangwara; Uye miromo inotapira inowedzera dzidzo.

²²Njere itsime roupenyu kunoanadzo; Asi kurairira kwamapenzi hupenzi.

²³Mwoyo wowakachenjera unodzidzisa muromo wake, Uchiwedzera dzidzo pamiromo yake.

²⁴Mashoko, anofadza, akaita somusvi wohuchi, Zvinotapira kumweya zvichiporesa mapfupa.

²⁵Munhu anoona nzira achiti yakarurama; Asi kuguma kwayo inzira dzorufu.

²⁶Nzara yomubati inomubatira; Nokuti muromo wake unomukurumidzira.

²⁷Munhu, asina maturo, anofungira vamwe zvakaipa; Pamiromo yake pano moto unopisa.

²⁸Munhu akatsauka anokusha kukakavara; Mucheri anoparadzanisa shamwari dzinodana.

²⁹Munhu anomanikidza, anonyengedzera wokwake, Achimutungamirira panzira isina kunaka.

³⁰Munhu anotsinzina meso ake, anozviita kuti afunge zvakatsauka, Anorumana miromo yake, atoita zvakashata.

³¹Vhudzi rachena ikorona yakaisvonaka, Inowanikwa panzira yokururama.

³²Ano mwoyo murefu anopfuura ane simba; Anodzora mweya wake, anopfuura anotapa musha.

³³Mijenya inokandirwa panguo dzechipfuva; Asi zvirevo zvose zvinotemwa nayo zvinobva kuna Jehovha.