Read Shona Union Version 2002 Zvirevo 17 Bible Online

Zvirevo 17 - Shona Union Version 2002 bible

Zvirevo 17

¹Chimedurwa chakaoma chechingwa norugare, Chinopfuura imba izere nezvakabayiwa nokukakavara.

²Muranda, anoita nouchenjeri, angaraira mwanakomana anonyadzisa, Achidya nhaka pamwechete navana.

³Hari yokunyausa ndeyesirivha, nevhira nderendarama; Asi Jehovha anoidza mwoyo yavanhu.

⁴Munhu, anoita zvakaipa, anoteerera miromo yakaipa; Murevi wenhema anorerekera nzeve yake kururimi rwakashata.

⁵Ani naani anoseka murombo, anozvidza Muiti wake; Anofara pamusoro penjodzi yavamwe, haangakoni kurohwa.

⁶Vazukuru ikorona yavatana; Kukudzwa kwavana ndiwo madzibaba avo.

⁷Kutaura kwamanyawi hakufaniri benzi; Zvikuru kutaura kune nhema hakufaniri muchinda.

⁸Fufuro yakaita sebwe rinokosha kana ichitarirwa nomwene wayo; Pose painoringira inofadza.

⁹Munhu anofukidza kudarika kwomumwe, anotsvaka rudo; Asi anoramba achimutsa shoko, anoparadzanisa shamwari dzinodana.

¹⁰Munhu ane njere anobayiwa nokutukwa Kupfuura benzi nokurohwa rune zana.

¹¹Munhu ano mwoyo wokumukira anongotsvaka zvakaipa; Asi achatumirwa nhume ino mwoyo mukukutu.

¹²Zviri nani kuti munhu asangane nechikara chatorerwa vana, Pakuti asangane nebenzi paupenzi hwaro.

¹³Ani naani anoripidzira zvakanaka nezvakaipa, Zvakaipa hazvingabvi paimba yake.

¹⁴Kuvamba kwokukakavara kwakafanana nokudziurira mvura; Saka rega rukave, kurwa kusati kwasvika.

¹⁵Anopembedza akaipa, noanopa wakarurama mhosva, Vose vari vaviri vanonyangadza Jehovha.

¹⁶Mari iri muruoko rwebenzi neiko kuti ritenge uchenjeri, Zvarisina njere.

¹⁷Shamwari inoda nguva dzose; Hama inoberekerwa kuti ibatsire pakutambudzika.

¹⁸Munhu anoshaiwa njere, ndiye anozvisunga noruoko rwake, Achizviitira wokwake rubatso.

¹⁹Anoda kukakavara, anoda kudarika; Anokurisa suo rake, anotsvaka kuparadzwa.

²⁰Ano mwoyo usakarurama haawani zvakanaka; Ano rurimi rusakarurama anowira munjodzi.

²¹Anobereka benzi achazonzwa shungu; Baba vebenzi havana mufaro.

²²Mwoyo wakafara unobatsira munhu kupora; Asi mweya wakaputsika unowomesa mapfupa.

²³Munhu akaipa anogamuchira fufuro inobva muchipfuva, Kuti aminamise nzira dzokururamisira.

²⁴Uchenjeri huri pamberi poane njere; Asi meso ebenzi ari pamigumo yenyika.

²⁵Mwanakomana benzi anochemedza baba vake, Anoitira mai vakamubereka zvinovava.

²⁶Uye, kuranga akarurama hakuzakanaka, Nokurova vakuru nokuda kwokururama kwavo.

²⁷Anozvidzora pamashoko ake, ane zivo; Uye ane mweya wakagadzikana, munhu wenjere.

²⁸Kunyange nebenzi, kana rinyerere, ringanzi rakachenjera; Anobumira muromo wake, achanzi akangwara.