Read Shona Union Version 2002 Zvirevo 18 Bible Online

Zvirevo 18 - Shona Union Version 2002 bible

Zvirevo 18

¹Anozviparadzanisa navamwe, anongotsvaka kuda kwake, Anorwa nohuchenjeri hwose kwahwo.

²Benzi harifariri kunzwisisa, Asi kuti mwoyo waro ufukurwe.

³Kana akaipa achisvika, kuzvidza kwasvikawo; Pamwechete nezvinonyadzisa, kushora kunouyawo.

⁴Mashoko omuromo womunhu akaita semvura yakadzika; Sorukova runoyerera, setsime rouchenjeri.

⁵Kutsaura akaipa hazvina kunaka; Kana kuramba akarurama pakutonga.

⁶Miromo yebenzi inouyisa kukakavara; Muromo waro unodana kurohwa.

⁷Muromo webenzi ndiko kuparadzwa kwaro; Miromo yaro musungo womweya waro.

⁸Mashoko omucheri akaita sezvimedu zvinozipa, Zvinoburukira mukati-kati momuviri.

⁹Naiye ane usimbe pakubata kwake, Munun'una womuparadzi.

¹⁰Zita raJehovha inhare yakasimba; Wakarurama anovangiramo ndokuchengetwa.

¹¹Pfuma yomupfumi ndiwo musha wake wakasimba, Uye sorusvingo rurefu pakufunga kwake.

¹²Mwoyo womunhu anozvikudza kuparadzwa kusati kwasvika; Kuzvininipisa kunotangira kukudzwa.

¹³Anopindura asati anzwa, Zvichava kwaari upenzi nokunyadziswa.

¹⁴Mweya womunhu unomusimbisa pakurwara kwake; Asi mweya wakaputsika ungamutswa nani?

¹⁵Mwoyo wowakachenjera unowana zivo; Nzeve yowakachenjera inotsvaka zivo.

¹⁶Chipo chomunhu chinomuwanira nzvimbo, Chinomuisa pamberi pavakuru.

¹⁷Anotanga kutambirwa mhaka yake anenge akarurama; Asi wokwake anosvika womuferefeta.

¹⁸Mijenya inogumisa kukakavara; Inotema chirevo pakati pavane simba.

¹⁹Hama yatadzirwa inopfuura guta rakasimba; Kukakavara kwakafanana nezvipfigiso zveimba yamambo.

²⁰Dumbu romunhu rinogutiswa nezvibereko zvomuromo wake; Achagutiswa nezvakawanda zvemiromo yake.

²¹Rurimi rune simba pamusoro porufu noupenyu; Vanoruda vachadya zvibereko zvarwo.

²²Awana mukadzi awana chinhu chakanaka, Avigirwa nyasha yaJehovha.

²³Murombo anokumbira achinyengetera; Asi mupfumi anopindura nehasha.

²⁴Munhu ane shamwari zhinji anoparadzwa; Asi shamwari iriko inonamatira kupfuura hama.