Read Shona Union Version 2002 Zvirevo 19 Bible Online

Zvirevo 19 - Shona Union Version 2002 bible

Zvirevo 19

¹Murombo, anofamba muzvokwadi yake, Anopfuura ane miromo isakarurama, iri benzi.

²Uye, kushingaira kusine zivo hakuna kunaka; Anokurumidza namakumbo ake anorasha nzira.

³Upenzi hwomunhu hunokanganisa nzira yake; Mwoyo wake unotsamwira Jehovha.

⁴Pfuma inouyisa shamwari zhinji; Asi murombo anosiyiwa neshamwari yake.

⁵Chapupu chenhema hachingakoni kurohwa; Anoreva nhema haangapukunyuki.

⁶Vazhinji vachatsvaka nyasha yomunhu anopavhurira; Munhu mumwe nomumwe ishamwari yoanopa zvipo.

⁷Hama dzose dzomurombo dzinomuvenga; Zvikuru shamwari dzake dzinoparadzana naye! Anovatevera namashoko, asi vaenda!

⁸Anowana huchenjeri, anoda hupenyu hwake; Anochengeta njere, achawana zvakanaka.

⁹Chapupu chenhema hachingakoni kurohwa; Anoreva nhema achaparadzwa.

¹⁰Kugara pakati pezvakanaka hazvifaniri benzi; Ndoda sei kuti muranda ave ishe wamachinda.

¹¹Kungwara kwomunhu kunodzora kutsamwa kwake; Kukudzwa kwake ndiko kukanganwira kudarika kwomumwe.

¹²Kutsamwa kwamambo kwakafanana nokuomba kweshumba; Asi nyasha dzake dzakaita sedova riri pauswa.

¹³Mwanakomana benzi inhamo yababa vake; Uye kukakavara kwomukadzi kudonha kusingaperi kwemvura.

¹⁴Dzimba nepfuma inhaka inobva kuna madzibaba; Asi mukadzi akangwara anobva kuna Jehovha.

¹⁵Usimbe hunowisira munhu pahope huru; Munhu asingabati achafa nenzara.

¹⁶Anochengeta murayiro, anochengeta upenyu hwake; Asi asina hanya nenzira dzake achafa.

¹⁷Anonzwira varombo tsitsi, anoposana naJehovha; Achamuripira basa rake rakanaka.

¹⁸Ranga mwanakomana wako, nokuti tariro ichipo; Usatsvaka kumuuraya.

¹⁹Munhu ane hasha zvikuru acharohwa; Nokuti kana uchimurwira, unongozvinyanyisa.

²⁰Teerera kana uchirairirwa, unzwe kana uchidzidziswa, Kuti pashure ugova wakachenjera.

²¹Mumwoyo womunhu mune ndangariro zhinji; Asi kurairira kwaJehovha ndiko kuchamira.

²²Munhu anodikanwa nokuda kwounyoro hwake; Murombo kurinani pamurevi wenhema.

²³Kutya Jehovha kunoisa kuupenyu; Unako, uchavata zvakanaka, Haangavingiwi nezvakaipa.

²⁴Simbe inopinza ruoko rwayo mundiro, isingadi kutongorudzosera kumuromo wayozve.

²⁵Rova mudadi, ipapo asina mano achazvingwarira; Raira ane njere, ipapo achanzwisisa zivo.

²⁶Anoitira baba vake simba, nokudzinga mai vake, Mwanakomana unonyadzisa nokuita zvinonyadza.

²⁷Mwanakomana wangu, rega kuteerera kana uchidzidziswa, Kana uchida hako kutsauka pamashoko ezivo.

²⁸Chapupu chisina maturo chinodada nokururama; Muromo wavakaipa unomedza zvakaipa.

²⁹Kutongwa kwakagadzirirwa vadadi; Neshamhu misana yamapenzi.