Read Shona Union Version 2002 Zvirevo 2 Bible Online

Zvirevo 2 - Shona Union Version 2002 bible

Zvirevo 2

¹Mwanakomana wangu, kana ukagamuchira mashoko angu, Nokuchengeta mirairo yangu kwauri;

²Kuti urerekere nzeve yako iteerere uchenjeri, Nokurwadza mwoyo wako, kuti unzwisise;

³Kana ukachemera kunzwisisa, Ukadanidzira nezwi rako kuti uwane njere;

⁴Zvirokwazvo kana ukahutsvaka sesirivha, Ukahutsvakisisa sepfuma yakavanzwa;

⁵Ipapo uchanzwisisa kutya Jehovha, Nokuwana zivo yaMwari.

⁶Nokuti Jehovha ndiye anopa uchenjeri; Mumuromo make munobuda zivo nenjere,

⁷Unovigira vakarurama uchenjeri chaihwo; Ndiye nhoo yavanofamba muzvokwadi;

⁸Nokuti anorinda makwara okururamisa, Nokuchengeta nzira yavatsvene vake.

⁹Ipapo uchanzwisisa kururama nokururamisa, Nokutendeka, idzo nzira dzose dzakanaka.

¹⁰Nokuti uchenjeri huchapinda mumwoyo mako, Zivo ichafadza mweya wako;

¹¹Kungwara kuchakurindira, Njere dzichakuchengeta;

¹²Zvikurwire panzira yezvakaipa, Napavanhu vanotaura zvisakarurama;

¹³Vanorasha makwara okururama, Kuti vafambe nenzira dzerima;

¹⁴Vanofarira kuita zvakaipa, Vanofadzwa nokunyengera kwezvakaipa.

¹⁵Vane nzira dzakaminama, Vanotsauka pamakwara avo;

¹⁶Kuti zvikurwire kumukadzi wokumwe, Kumukadzi mutorwa, anobata kumeso namashoko ake.

¹⁷Iye, anorasha shamwari yohumhandara hwake, Achikanganwa sungano yaMwari wake.

¹⁸Nokuti imba yake inonyura kurufu, Nenzira dzake kuvakafa;

¹⁹Hakuna anopinda kwaari anozodzokazve; Havasviki panzira dzoupenyu;

²⁰Kuti ufambe nenzira yavakanaka, Uchengete makwara avakarurama.

²¹Nokuti vakarurama vachagara panyika, Vakakwana vachafambirapo.

²²Asi vakaipa vachaparadzwa panyika; Vanoita nokunyengedzera vachadzurwapo.