Read Shona Union Version 2002 Zvirevo 20 Bible Online

Zvirevo 20 - Shona Union Version 2002 bible

Zvirevo 20

¹Waini mudadi, doro mupopoti; Ani naani anobatwa nazvo, haana kuchenjera.

²Kuvhundusa kwamambo kwakaita sokuomba kweshumba; Anomutsamwisa, anozvitadzira hupenyu hwake.

³Munhu anokudzwa kana achigara kure nokukakavara; Asi benzi rimwe nerimwe rinokakavara.

⁴Simbe hairimi kana kune chando; Saka kana achitsvaka zvibereko pakucheka, hazvipo.

⁵Mano mumwoyo womunhu angaita semvura yakadzika; Asi munhu wenjere achaichera.

⁶Vanhu vazhinji vanowana munhu anovaitira chinhu chakanaka, Asi ndiani angawana munhu akatendeka?

⁷Munhu akarurama, anofamba muzvokwadi yake, Vana vake vanomutevera vacharopafadzwa.

⁸Mambo, anogara pachigaro chokutonga, Anodzinga zvakaipa zvose nameso ake.

⁹Ndiani angati, “Ndachenesa mwoyo wangu, Ndanatswa zvivi zvangu?”

¹⁰Zviidzo zvakasiyana, nezviyero zvakasiyana, Izvozvo zvose zvinonyangadza Jehovha.

¹¹Kunyange nomwanakomana anozvizivisa nezvaanoita, Kana basa rake rakanaka, kana rakarurama.

¹²Nzeve, inonzwa, neziso, rinoona, Jehovha akazviita zvose.

¹³Usada hope, kuti urege kuzova murombo; Svinudza meso ako, kuti ugogutiswa nezvokudya.

¹⁴“Chakaipa, chakaipa!” Ndizvo zvinoreva mutengi; Asi kana woenda wozvirumbidza.

¹⁵Ndarama iriko, nekorari zhinji; Asi miromo yezivo ndicho chinhu chinokosha kwazvo.

¹⁶Mutorerei nguo yake, iye wakazviita rubatso kumutorwa; Ngaave rubatso rwavatorwa.

¹⁷Munhu anoti zvokudya zvenhema zvakanaka, Asi pashure muromo wake uchazara nejecha.

¹⁸Mano anobva pakurangana; Urwe pfumo wamborairirwa nohuchenjeri.

¹⁹Anofamba ana makuhwa, anobudisa zvakavanda; Saka usashamwaridzana nomunhu anoshamisa miromo yake.

²⁰Anotuka baba vake kana mai vake, Mwenje wake uchadzimwa parima rakasviba.

²¹Nhaka, yakawanikwa nokukurumidza pakutanga, Haingaropafadzwi pakupedzisira.

²²Usati, “Ndachatsiva zvakaipa;” Mirira Jehovha, iye achakuponesa.

²³Zviidzo, zvakasiyana, zvinonyangadza Jehovha; Nechiyero chinonyengedzera hachina kunaka.

²⁴Kufamba kwomunhu kunobva kuna Jehovha; Zvino munhu anganzwisisa seiko nzira yake?

²⁵Musungo kumunhu kupika achiti, “Chitsvene!” Asina kumborangarira, Ndokuzofungisisa ambopika.

²⁶Mambo akachenjera anozungura vakaipa, Achivapura nomupuro.

²⁷Mweya womunhu mwenje waJehovha; Anonzvera zvose zviri mukati-kati.

²⁸Rudo nokutendeka zvinochengeta mambo; Chigaro chake choushe chinotsigirwa norudo.

²⁹Majaya anokudzwa nokuda kwesimba rawo; Ukomba hwavatana ndiyo misoro yakachena.

³⁰Kurohwa kunokuvadza kunonatsa zvakaipa; Kurohwa kunopinda mukati-kati.