Read Shona Union Version 2002 Zvirevo 21 Bible Online

Zvirevo 21 - Shona Union Version 2002 bible

Zvirevo 21

¹Mwoyo wamambo uri muruoko rwaJehovha sehova dzemvura; Anoufambisa sezvaanoda.

²Nzira ipi neipi yomunhu anoti yakarurama pakuona kwake; Asi Jehovha anoyera mwoyo.

³Kuita zvakarurama nokururamisira Zvinofadza Jehovha kupfuura chibayiro.

⁴Kutarira kwamanyawi nomwoyo unozvikudza, Icho chiedza chavakaipa, zvivi.

⁵Ndangariro dzavashingairi dzinouyisa zvizhinji; Asi ani naani anokurumidzisa anongovangira kushaiwa.

⁶Kuunganidza pfuma norurimi runorevha nhema Imhute inodzingwa kwose-kwose navanotsvaka rufu.

⁷Kumanikidza kwavakaipa kunovaparadza, Nokuti vanoramba kuita zvakarurama.

⁸Nzira yomunhu ane mhosva yakaminama kwazvo; Asi kana ari akachena, kuita kwake kwakarurama.

⁹Zviri nani kugara pakona redenga, Pakugara muimba imwe nomukadzi anokakavara.

¹⁰Mweya wowakaipa unoda zvakaipa; Wokwake haawani nyasha kwaari.

¹¹Kana mudadi achirangwa, asina mano achava nouchenjeri; Kana wakachenjera achidzidziswa, anogamuchira zivo.

¹²Akarurama anocherekedza imba yowakaipa; Anowisira vakaipa mukuparadzwa.

¹³Anodzivira nzeve yake, kuti arege kunzwa kuchema kwomurombo, Iyewo achachema, asi haanganzwiki.

¹⁴Chipo, chinopiwa pakavanda, chinonyaradza hasha, Nechipiwa, chiri muchipfuva, kutsamwa kukuru.

¹⁵Kuita zvakarurama ndiwo mufaro kunoakarurama; Asi vaiti vezvakaipa vanoparadzwa nako.

¹⁶Munhu, anotsauka panzira yenjere, achandozorora muungano yavakafa.

¹⁷Anofarira zvinofadza, achava murombo; Anofarira waini namafuta haangapfumi.

¹⁸Akaipa idzikunuro yowakarurama; Anoita nokunyengedzera anopinda panzvimbo yowakarurama.

¹⁹Zviri nani kugara murenje, Pakugara nomukadzi anokakavara noanonetsa.

²⁰Mumba mowakachenjera mune pfuma inokosha namafuta, Asi benzi rinozvipedza.

²¹Munhu, anotsvaka kururama nounyoro, Anowana upenyu, nokururama, nokukudzwa.

²²Munhu akachenjera anokwira muguta ravane simba, Achiwisira pasi nhare yavanovimba nayo.

²³Ani naani anochengeta muromo wake norurimi rwake, Anochengeta mweya wake pamadambudziko.

²⁴Munhu, anozvikudza ana manyawi, mudadi ndiro zita rake; Anoita namanyawi okuzvikudza kwake.

²⁵Kuda kwoane usimbe kunomuuraya; Nokuti maoko ake anoramba kubata basa.

²⁶Zuva rose anoramba achingochiva; Asi akarurama anopa asingarambi.

²⁷Chibayiro chowakaipa chinonyangadza; Ndoda kana achiuya nazvo kuyananisira zvakaipa.

²⁸Chapupu chenhema chichaparadzwa; Asi munhu unoteerera, acharamba achitaura.

²⁹Munhu akaipa ane chiso chisinganyari; Asi kana ari akarurama anogadzira nzira dzake.

³⁰Hakuna uchenjeri, kana njere, Hakuna mano angakunda Jehovha.

³¹Bhiza rinogadzirirwa zuva rokurwa, Asi kukunda kunobva kuna Jehovha.