Read Shona Union Version 2002 Zvirevo 22 Bible Online

Zvirevo 22 - Shona Union Version 2002 bible

Zvirevo 22

¹Zita rakanaka rinofanira kutsanangurwa kupfuura pfuma zhinji; Uye kudikanwa kupfuura sirivha nendarama.

²Vapfumi navarombo vanosangana pamwechete; Jehovha ndiye muiti wavo vose.

³Munhu akangwara anoona zvakaipa, ndokuvanda; Asi vasina mano vanopfuura havo, ndokuwira munjodzi.

⁴Mubayiro wokuzvininipisa nokutya Jehovha Ipfuma nokukudzwa noupenyu.

⁵Minzwa nemisungo zviri panzira yousakarurama; Asi anochengeta mweya wake achagara kure nazvo.

⁶Rovedza mwana nzira yaanofanira kufamba nayo, Ipapo kunyange akwegura haangatsauki pairi.

⁷Mupfumi anobata ushe pamusoro pomurombo; Anotora chikwerete, muranda, wowakamupa chikwerete.

⁸Unodzvara zvakaipa, uchacheka dambudziko; Shamhu yokutsamwa kwake ichanyangarika.

⁹Ane mwoyo munyoro acharopafadzwa; Nokuti anopa varombo zvokudya zvake.

¹⁰Dzinga mudadi, kukakavara kugoendawo; Nenharo nokunyadzwa zvichaguma.

¹¹Anoda kuchena kwomwoyo, Nowane miromo inofadza, mambo achava shamwari yake.

¹²Meso aJehovha anochengeta ane zivo; Asi achakonesa mashoko omunhu anonyengedzera.

¹³Simbe inoti, “Kune shumba kunze, Ndingaurawa pakati penzira dzomumusha.”

¹⁴Muromo wavakadzi vokumwe igomba rakadzika; Anotsamwirwa naJehovha achawiramo.

¹⁵Upenzi hunonamatira mumwoyo womwana; Asi shamhu yokurairira ichahudzingira kure naye.

¹⁶Anomanikidza murombo, anomupfumisa; Anopa mupfumi zvipo, anongomushaisa.

¹⁷Rerekera nzeve yako, unzwe mashoko owakachenjera, Mwoyo wako urangarire zivo yangu.

¹⁸Nokuti chinhu chakanaka, kana uchigara nazvo mukati mako, Ngazvigare pamwechete pamiromo yako.

¹⁹Ndakakuzivisa, iyewe, izvozvo nhasi, Kuti uvimbe naJehovha.

²⁰Handina kukunyorera mashoko akaisvonaka here, Okurairira nezivo here?

²¹Kuti uziviswe kwazvo mashoko ezvokwadi, Kuti udzosere mashoko ezvokwadi kuna vanokutuma here?

²²Usatorera murombo, nokuti murombo; Usamanikidza anotambudzika pasuo;

²³Nokuti Jehovha achavarwira pamhaka dzavo, Nokutadzira upenyu hwavanovatadzira.

²⁴Usashamwaridzana nomunhu anotsamwa; Usafambidzana nomunhu ane hasha;

²⁵Kuti urege kudzidza tsika dzake, Uteyire mweya wako musungo.

²⁶Usava mumwe wavanozvisunga noruoko, Kana vakazviita rubatso nokuda kwechikwerete.

²⁷Kana usina chaungaripa nacho, Achagokutorereiko nhoo dzako pasi pako?

²⁸Usabvisa muganho wekare, Wakaiswapo namadzibaba ako.

²⁹Unoona munhu anoshingaira pabasa rake here? Achamira pamberi pamadzimambo; Haangamiri pamberi pavanhu vasingazikanwi.