Read Shona Union Version 2002 Zvirevo 24 Bible Online

Zvirevo 24 - Shona Union Version 2002 bible

Zvirevo 24

¹Usagodora vanhu vakaipa; Usashuva kuva pakati pavo.

²Nokuti mwoyo yavo inorangarira kuparadza; Nemiromo yavo inotaura zvakashata.

³Imba inovakwa nouchenjeri; Inosimbiswa nenjere.

⁴Nezivo dzimba dzomukati dzinozadzwa Nepfuma yose inokosha inofadza.

⁵Munhu akachenjera ane simba; Zvirokwazvo, munhu wezivo anowedzera simba.

⁶Nokuti anofanira kurwa pfumo amborairirwa nouchenjeri; Asi kuna varairiri vazhinji ndiko kune ruponeso.

⁷Uchenjeri hahusvikirwi nebenzi; Harishamisi muromo waro padare.

⁸Anorangarira kuita zvakaipa, Achanzi navanhu mwene wezvakashata.

⁹Mufungo woupenzi zvivi; Mudadi anonyangadza vanhu.

¹⁰Kana ukapera simba nezuva rokutambudzika, Simba rako ishoma.

¹¹Rwira vanoiswa kurufu; Novourawa usarega kuvadzosa.

¹²Kana ukati, “Tarirai, hatina kuzviziva;” Ko iye anoidza mwoyo, haazvioni here? Naiye anochengeta mweya wako, haazvizivi here? Ko iye haangapi mumwe nomumwe zvakaenzana nebasa rake here?

¹³Mwanakomana wangu, idya uchi, nokuti hwakanaka; Nomusvi unozipa pamukanwa wako.

¹⁴Uchaona kuti ndizvo zvichaita uchenjeri kumweya wako; Kana wahuwana, mubayiro uchavapo, Nezvakatarira hazvingaparadzwi.

¹⁵Iwe munhu akaipa, usavandira panogara wakarurama; Usaparadza paanozorora.

¹⁶Nokuti munhu akarurama angawa kanomwe, achisimukazve; Asi vakaipa vanowisirwa pasi nenjodzi.

¹⁷Usafarisisa kana muvengi wako achiwa; Kana achiwisirwa pasi, mwoyo wako ngaurege kufara.

¹⁸Kuti Jehovha arege kuzviona, zvisamufadza, Akazodzora kutsamwa kwake kwaari.

¹⁹Usatsamwa nokuda kwavaiti vezvakaipa; Uye usagodora vakaipa.

²⁰Nokuti munhu akaipa haana mubayiro; Mwenje wakaipa uchadzimwa.

²¹Mwanakomana wangu, itya Jehovha namambo; Usafambidzana navanongosishanduka.

²²Nokuti nhamo yavo ichamuka pakarepo; Nokuguma kwamakore avo, ndiani achazviziva?

²³Zvirevo izviwo zvakabva kuna vakachenjera, Kutsaura vanhu pakutonga hazvina kunaka.

²⁴Anoti kune wakaipa, “Akarurama,” Vanhu vachamutuka, nendudzi dzichamusema.

²⁵Asi vanomuraira, vachaitirwa zvakanaka; ropafadzo yakanaka ichauya pamusoro pavo.

²⁶Anopindura namashoko akarurama, Atsvoda nemiromo.

²⁷Gadzira basa rako kunze, Uzvigadzirire iro pamunda; Pashure ugovaka imba yako.

²⁸Usava chapupu chinopomera wokwako asina mhosva; Usanyengedzera nemiromo yako.

²⁹Usati, “Sezvaakandiitira, ndizvo zvandichamuitirawo; Ndicharipira munhu sezvaakaita iye.”

³⁰Ndakapfuura napamunda wesimbe, Napamunda wemidzambiringa womunhu anoshaiwa njere;

³¹Tarirai, akanga angomera minzwa chete; Munda wose wakanga wakafukidzwa norukato, Norusvingo rwawo rwamabwe rwakanga rwakoromoka.

³²Ipapo ndakacherekedza, ndikanatsofunga; Ndakaona, ndikadzidziswa.

³³Kumbovata zvishomanene, kumbotsimwaira zvishomanene, Kumbofungatira maoko zvishomanene, ndizorore;

³⁴Saizvozvo urombo hwako huchasvika segororo, Nokushaiwa kwako somunhu akashonga nhumbi dzokurwa.