Read Shona Union Version 2002 Zvirevo 25 Bible Online

Zvirevo 25 - Shona Union Version 2002 bible

Zvirevo 25

¹Izvowo ndizvo zvirevo zvaSoromoni, zvakanyorwa navanhu vaHezekia mambo wavaJudha,

²Ndiko kukudzwa kwaMwari kuti avanze chinhu; Asi kukudzwa kwamadzimambo ndiko kuti vanzvere mhosva.

³Kukwirira kwedenga, nokudzika kwenyika, Nemwoyo yamadzimambo hazvibviri kunzverwa.

⁴Bvisa marara pasirivha, Muumbi agobudisirwa hari.

⁵Bvisa akaipa pamberi pamambo, Chigaro chake choushe chisimbiswe nokururama.

⁶Usava namanyawi pamberi pamambo; Usamira panzvimbo yavakuru.

⁷Nokuti zviri nani kuti vati kwauri, “Kwira pano,” Pakuti uninipiswe pamberi pomuchinda. Wawaona nameso ako

⁸Usakurumidza kundoita nharo; Nokuti uchazodini pashure, Kana wokwako akunyadzisa?

⁹Rangana nowokwako pamusoro pemhosva iri pakati penyu, Asi usareurura zvakavanzika zvomumwe;

¹⁰Kuti mumwe anozvinzwa arege kukutuka, Gungwa rako rikasaguma.

¹¹Shoko rinotaurwa nenguva yakafanira, Rakafanana namatamba endarama mumidziyo yesirivha.

¹²Murairi akachenjera panzeve inoteerera, Zvakafanana nechindori chenzeve chendarama noukomba hwendarama yakaisvonaka.

¹³Nhume yakatendeka kuna vanoituma yakafanana nokutonhorera kwechando panguva yokucheka; nokuti anoponesa mweya yavatenzi vayo.

¹⁴Munhu anozvirumbidza pamusoro pechipo chenhema, Akafanana namakore nemhepo zvisina mvura.

¹⁵Mubati anokundwa kana achiitirwa mwoyo murefu, Uye rurimi runyoro runovhuna mapfupa.

¹⁶Wawana uchi here? Chidya hunokuringana, Kuti urege kuzvimbirwa nahwo, ukahurutsa.

¹⁷Rutsoka rwako ngarurege kuwanza kupinda paimba yowokwako; Arege kuzoneta newe, akakuvenga.

¹⁸Munhu anopupurira wokwake nhema, Akafanana netsvimbo, nomunondo, nomuseve unopinza.

¹⁹Kutenda munhu asina kutendeka panguva yenhamo, Kwakafanana nezino rakagurika norutsoka rwakashodoka.

²⁰Somunhu anobvisa nguo kana kuchitonhora, uye sevhiniga kana ichiiswa pasoda, Ndizvo zvakaita munhu anoimbira mwoyo unorwadza nziyo.

²¹Kana muvengi wako ane nzara, umupe zvokudya adye; Kana ane nyota, umupe mvura anwe.

²²Nokuti uchatutira mazimbe omoto pamusoro wake, Uye Jehovha achakuripira.

²³Mhepo inobva kuchamhembe inouyisa mvura; Saizvozvo rurimi runa makuhwa runouyisa chiso chakatsamwa.

²⁴Zviri nani kugara pakona redenga, Pakugara muimba imwe nomukadzi unokakavara.

²⁵Shoko rakanaka, rinobva kunyika iri kure, Rakafanana nemvura inotonhorera kumweya ane nyota.

²⁶Munhu akarurama, anozununguka pamberi pavakaipa, Akafanana netsime rakabvongodzwa nechitubhu chine tsvina.

²⁷Hazvina kunaka kudya uchi huzhinji; Asi kunzvera zvinorema ndiko kukudzwa.

²⁸Munhu asingadzori mweya wake, Akafanana neguta rakaputswa, risina rusvingo.