Read Shona Union Version 2002 Zvirevo 26 Bible Online

Zvirevo 26 - Shona Union Version 2002 bible

Zvirevo 26

¹Sezvakaita chando muzhizha, uye sezvakaita mvura mukucheka, Saizvozvo kukudzwa hakufaniri benzi.

²Sezvinoita shiri pakupaparika kwayo, nenyenganyenga pakubhururuka kwayo, Saizvozvo kutuka pasina mhosva hakuitiki.

³Tyava yakaitirwa bhiza, namatomu mbongoro, Neshamhu musana wamapenzi.

⁴Usapindura benzi noupenzi hwaro, Kuti urege kufanana naro.

⁵Pindura benzi noupenzi hwaro, Kuti rirege kuti rakachenjera.

⁶Anotuma shoko noruoko rwebenzi, Unozvigura tsoka, nokunwa kutambudzika.

⁷Makumbo echirema anongoremberera; Ndizvo zvakaita chirevo mumuromo webenzi.

⁸Somunhu anosungira ibwe pachifuramabwe, Ndizvo zvakaita iye anokudza benzi.

⁹Sezvinoita minzwa muruoko rwomukariri wedoro, Ndizvo zvakaita chirevo mumuromo webenzi.

¹⁰Somufuri wemiseve, anofura zvose, Ndizvo zvakaita munhu anosevenzesa benzi neanosevenzesa vafambi.

¹¹Sembwa inodzokera kumarutsi ayo, Ndizvo zvakaita benzi rinopamhidza upenzi hwaro.

¹²Unoona munhu anoti ndakachenjera here? Benzi riri nani kuna iye!

¹³Simbe inoti, “Kune shumba panzira; Shumba iri munzira dzomumusha.”

¹⁴Gonhi rinotendereka pamahinji aro; Ndizvo zvinoita simbe panhoo dzayo.

¹⁵Simbe inopinza ruoko rwayo mundiro, Ino usimbe kurudzoserazve kumuromo wayo.

¹⁶Simbe inozviti ndakachenjera Kupfuura vanhu vanomwe vanogona kupindura nenjere.

¹⁷Somunhu anobata imbwa nenzeve dzayo, ichingopfuura hayo, Ndizvo zvakaita munhu anozvipinza pagakava raasina mhosva naro.

¹⁸Somupengo anokanda zvitsika, Nemiseve, nezvinouraya,

¹⁹Ndizvo zvinoita munhu anonyengedzera wokwake, Achiti, “Ndinongoita zvangu jee!”

²⁰Moto unodzima nokushaiwa huni; Uye kana kusina mucheri, gakava rinopera.

²¹Sezvakaita mazimbe pazvitsika zvinopfuta, nehuni pamoto, Ndizvo zvakaita munhu wegakava pakupfutidza rukave.

²²Mashoko omucheri akaita sezvimedu zvinozipa, Zvinoburukira mukati-kati momuviri.

²³Miromo inopisa norudo pamwechete nomwoyo wakaipa, Zvakafanana nomudziyo wevhu wakanamirwa namarara anobva pasirivha.

²⁴Muvengi anonyengedzera nemiromo yake, Asi anovanza kunyengedzera mumwoyo make.

²⁵Kana achitaura zvinonaka, usamutenda; Nokuti mumwoyo make mune zvinonyangadza zvinomwe.

²⁶Kunyange kuvenga kwake kuchizvivanza nokunyengedzera, Kushata kwake kuchabudiswa pachena pamberi peungano.

²⁷Ani naani anochera gomba, achawiramo iye; Anokungurusa ibwe, richadzokera pamusoro pake.

²⁸Rurimi rwenhema runovenga akuvadzwa narwo; Nomuromo unobata kumeso unoparadza.