Read Shona Union Version 2002 Zvirevo 27 Bible Online

Zvirevo 27 - Shona Union Version 2002 bible

Zvirevo 27

¹Usazvirumbidza pamusoro pezuva ramangwana; Nokuti hauzivi chaungavigirwa nezuva rimwe.

²Mumwe ngaakurumbidze, urege kuva muromo wako; Ngaave mweni, irege kuva miromo yako.

³Ibwe rinorema, uye jecha rinorema; Asi kutsamwa kwebenzi kunokurira zvose nokurema.

⁴Hasha dzinokuvadza, uye kutsamwa kunokukura; Asi ndiani angamira pamberi pegodo.

⁵Kurairwa pachena kunopfuura Rudo rwakavanzwa.

⁶Mavanga anotemwa neshamwari angatendwa, Asi kutsoda kwomuvengi kunonyengedza.

⁷Mweya wakaguta unotsika pasi musvi wouchi; Asi mweya une nzara unoti zvose zvinozipa kunyange zvichivava.

⁸Seshiri inoburuka ichienda kure nedendere rayo, Ndizvo zvakaita munhu anofamba-famba kure napaanogara.

⁹Mafuta nezvinonhuwira zvinofadza mwoyo; Ndizvo zvinoitawo kunaka kwoushamwari hwomunhu kunobva pakuyanana kwemweya.

¹⁰Usasiya shamwari yako neshamwari yababa vako; Usaenda kumba kwomunun'una wako nezuva renhamo yako; Wokwako, ari pedyo, anopfuura munun'una uri kure.

¹¹Mwanakomana wangu, iva wakachenjera, ufadze mwoyo wangu; Kuti ndigone kupindura anondishora.

¹²Munhu akangwara anoona zvakaipa, ndokuvanda; Asi vasina mano vanopfuura havo, ndokuwira munjodzi.

¹³Munhu anozviita rubatso kumutorwa, umutorere nguo yake; Umuite rubatso iye akazviita rubatso kumukadzi wokumwe.

¹⁴Anoropafadza shamwari yake nezwi guru, achifumira mangwanani, Achanzi wakatukwa pamusoro pazvo.

¹⁵Kudonha kusingaperi pazuva remvura zhinji Nomukadzi anokakavara, zvakafanana.

¹⁶Anoda kumudzivisa, anodzidzisa mhepo; Ruoko rwake rworudyi rwakabata mafuta.

¹⁷Simbi inorodza simbi; Saizvozvo munhu anorodza chiso cheshamwari yake.

¹⁸Ani naani anochengeta muonde, achadya zvibereko zvawo; Anochengeta tenzi wake, achakudzwa.

¹⁹Chiso sezvachinotarisana nechiso mumvura, Saizvozvo mwoyo womunhu unotarisana nomunhu.

²⁰Sheori neAbhadhoni hazvitongoguti; Nameso omunhu haaguti.

²¹Hari yokunyausa ndeyesirivha, nevhira nderendarama; Saizvozvo munhu anozikanwa nezvaanofarira.

²²Kunyange ukatswa benzi muduri nomutsi pakati pezviyo zvinotsiwa, Hupenzi hwaro hahungabvi kwariri.

²³Shingaira uzive kuti makwai ako akadini; Uchengete zvakanaka mapoka ako.

²⁴Nokuti pfuma haigari nokusingaperi; Ko korona inogara kusvikira kumarudzi ose here?

²⁵Uswa hunoenda, bumhudza ndokubuda, Nemiriwo yamakomo inovhunganidzwa.

²⁶Makwayana anokuvigira zvokufuka zvako, Uye mbudzi ndiwo mutengo weminda.

²⁷Mukaka wembudzi ucharingana zvokudya zvako, nezvokudya zveimba yako, Nokuraramisa varandasikana vako.