Read Shona Union Version 2002 Zvirevo 28 Bible Online

Zvirevo 28 - Shona Union Version 2002 bible

Zvirevo 28

¹Akaipa anotiza kusina anodzingana naye; Asi vakarurama vanotsunga mwoyo seshumba.

²Nemhaka yokudarika kwenyika, machinda ayo anowanda; Asi nomumwe, ane njere nezivo, icharamba iripo.

³Munhu anoshaiwa amene, anomanikidza varombo, Akafanana nemvura inokukura, isingasiyi zvokudya.

⁴Vanosiya murayiro, vanorumbidza vakaipa; Asi vanochengeta murayiro, vanoita nharo navo.

⁵Vanhu vakashata havanzwisisi zvakarurama; Asi vanotsvaka Jehovha vanonzwisisa zvose.

⁶Murombo, anofamba muzvokwadi yake, Anopfuura asakarurama anofamba nenzira mbiri, kunyange akapfuma.

⁷Anochengeta murayiro, mwanakomana akachenjera; Asi anofambidzana navanhu vana madyo, vanonyadzisa baba vake.

⁸Anowedzera pfuma yake nemhindu kana nokuwedzera kusakarurama, Anounganidzira mumwe achava netsitsi navarombo.

⁹Anoramba kunzwa murayiro nenzeve yake, Kunyange nomunyengetero wake anonyangadza.

¹⁰Ani naani anorashisa vakarurama vafambe nenzira yakaipa, Achawira amene mugomba rake; Asi vakarurama vachagara nhaka yezvakanaka.

¹¹Mupfumi anoti ndakachenjera; Asi murombo, ane njere, anomuferefeta.

¹²Kana vakarurama vachikunda, mufaro mukuru uriko; Asi kana vakaipa vosimba, vanhu vovanda.

¹³Anofukidza kudarika kwake, haangavi nomufaro; Asi anozvireurura, achizvirasha, achawana nyasha.

¹⁴Munhu anogara achitya, anomufaro; Asi anoomesa mwoyo wake, achawira munjodzi.

¹⁵Seshumba inoomba, nebere rinopota-pota, Ndizvo zvakaita mubati akaipa anobata vanhu varombo.

¹⁶Muchinda, anoshaiwa njere, anomanikidza vanhuwo zvikuru; Asi anovenga kuchiva, achawedzera mazuva ake.

¹⁷Munhu, anoremedzwa neropa romumwe munhu, Achatizira kugomba; ngaarege kudziviswa nomunhu.

¹⁸Ani naani anofamba zvakarurama, acharwirwa; Asi anofamba nenzira dzisakarurama, achawa pakarepo.

¹⁹Anorima munda wake, achava nezvokudya zvizhinji; Asi unovangira zvisina maturo, uchava nourombo kwazvo.

²⁰Munhu akatendeka achava namaropafadzo mazhinji; Asi anoda kupfuma nokukurumidza, haangakoni kurohwa.

²¹Kutsaura vanhu hakuna kunaka; Nokuti munhu angadarika nokuda kwechimedu chechingwa.

²²Munhu ano ruchiva, anovangira pfuma, Asingazivi kuti achawirwa nokushaiwa.

²³Anorairira munhu achazowana nyasha pashure, Kupfuura iye anobata kumeso norurimi rwake.

²⁴Anobira baba vake kana amai vake, achiti, “Hakuzi kudarika,” Uyu ishamwari yoanoparadza.

²⁵Ano mweya wokuchiva anomutsa kukakavara; Asi anovimba naJehovha, achasimbiswa.

²⁶Anotenda mwoyo wake, ibenzi; Asi anofamba nouchenjeri, acharwirwa.

²⁷Anopa varombo, haangazoshaiwi; Asi anotsinzina meso ake, achatukwa kazhinji.

²⁸Kana vakaipa vosimba, vanhu vovanda; Asi kana voparara, vakarurama vowanda.